لاہور۔ 11جون (اے پی پی) لاہور ہائیکورٹ حمزہ شہباز نا درخواست ضمانت ءِ مسترد کرے اوکان پد نیب انا ٹیم حمزہ شہباز شریف ءِ دزگیر کرے۔ سرجم حوال آتارداٹ لاہور ہائیکورٹ اٹی جسٹس سید مظاہر علی اکبر نقوی نا کماشی ٹی اِراباسکی بینچ کٹیا غان زیات میرات و رمضان شوگر ملز کیس اٹی حمزہ شہباز نا درخواست ءِ ضمانت نا سماعت ءِ کرے۔ حمزہ شہباز وکیل آتون اوار عدالت نا مون آ پیش مس۔ حمزہ شہباز نا وکیل سلمان بٹ دلیل ترسا پارے کہ نیب کانود نا رداٹ انکوائری ءِ پورو مننگ اسکان وارنٹ دزگیری جاری کننگ مفک، داسکان منی لانڈرنگ کیس انا انکوائری جاری ءِ و حمزہ شہباز جاست وپاستی ٹیم اتون پورو کمک کننگ ءِ۔ وکیل حمزہ شہباز پارے کہ حمزہ شہباز نا بے سوب وارنٹ دزگیری جاری کننگا، چندی فیصلہ غاک ہم اریر کہ انکوائری ٹی دوبہ دار ءِ دزگیر کننگ مفک۔ ہراڑا جسٹس سید مظاہر علی اکبر نقوی ریمارکس تس کہ فیصلہ آئین و کانود نار داٹ مریک، عدالت پورو انصاف کیک۔ نیب پراسیکیوٹر تینا دلیل آتے ٹی پارے کہ حمزہ شہباز نا وارنٹ دزگیری کانود نا رداٹ جاری کننگانے، فنانشل مانیٹرنگ یونٹ حمزہ شہباز نا منی لانڈرنگ نا پیدواری ءِ کرے، او شہباز شریف نا خاہوت نا میرات آتا سرجم آتے عدالت اٹی جمع کرفے۔ پراسیکیوٹر نیب پارے کہ شہباز شریف خاہوت نا میرات کٹیا غان کیہی زیات ءِ، منی لانڈرنگ کیس اٹی بیرہ حمزہ شہباز آخا بلکن شہباز شریف، نصرت شہباز و سلمان شہباز ہم اوارو۔ پراسیکیوٹر نیب پارے کہ شہباز شریف نا خاہوت نا میرات آتے ٹی ارب آ روپئی ودکی مس، حمزہ شہباز کٹیا غان زیات میرات آتا معاملہ غا شاہدی تننگ کتنے۔ نیب انا وکیل تینا موقف اٹی پارے کہ حمزہ شہباز نا رمضان شوگر ملز اٹی درخواست ضمانت ناقابل سماعت ءِ، جرمانہ عائد کرسا مسترد کننگے، اونا نیب آ دوبہ غاک درو و بے بنداو ءُ، او2015ء ٹی 36کروڑ روپئی آن ہندی آبادی نا پن آ رمضان شوگر ملز اکن نالہ اس جوڑ کرے۔ عدالت ریمارکس تس کہ ننا مون آ کیس بیرہ حمزہ شہباز نا ءِ نی بیرہ حمزہ شہباز نا ضمانت نا حد اسکان عدالت اٹ دلیل ایت۔ جسٹس سید مظاہر علی اکبر نقوی ریمارکس تس کہ سد درسد کانود نا رداٹ فیصلہ مریک، پیشن انت ہیت مننگ ءِ ننے ہچ کس تون غرض اف، ننے بیرہ اللہ ءِ جواب تروئی ءِ۔ عدالت سماعت آن پد حمزہ شہباز نا درخواست ضمانت ءِ مسترد کرے۔ ضمانت منسوخ مننگ تون ہی نیب انا ٹیم حمزہ شہباز ءِ دزگیر کرے۔
