اسلام آباد۔ 12 فروری (اے پی پی) اسپیکر قومی اسمبلی اسد قیصر پارینے کہ پاکستان و اوغانستان نا نیام اٹ تعلقداری مذہب، ایلمی ، دودوربیدگ و ہمسائیگی نا سوگو بنداو تیا ٹی ءُ، سیم انا ہڑتوم آ کنڈ انا الس نا نیام اٹ مہر و مابت و تین پہ تینی شرف نا رشتہ ءِ۔ داخیال آتا درشانی ءِ او سے شنبے نادے آ پاکستان اٹی اوغانستان نا پندار سفیر شاکراللہ عاطف مشال تون اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری، ڈیہہ ٹی امن و ایمنی نا حالیت و تین پہ تینی است خواہی نا ایلو معاملہ غاتیا گپ و تران کننگا۔ اوڑدہی ٹی اسد قیصر پارے کہ پاکستان و اوغانستان نا نیام اٹ تعلقداری، مذہب، اخوت ، دودوربیدگ و ہمسائیگی ناسوگو بنداو تیا ٹی ءُ، سیم انا ہڑتوم آ کنڈآتا الس نا نیام اٹ مہر و مابت و تین پہ تینی شرف نا رشتہ ءِ۔ اوپارے کہ پاکستان اسہ پرامن، سوگو و شونہال اوغانستان اسے ہُننگ نا خواہندار ءِ، پر امن و سوگو اوغانستان ڈیہہ نا امن و سلامتی کن المی ءِ۔ اسپیکر قومی اسمبلی پارے کہ پاکستان ڈیہہ و جہانی پارٹنر آتون اواری اٹ اوغانستان اٹی پائیدار امن کن کوشست کننگ ءِ، پارلیمانی سفارتکاری نا کمک اٹ پاکستان و اوغانستان نا نیام اٹ غلط فہمی تے مر کننگ و تین پہ تینی تعلقداری تے مون آ دننگ اٹ کمک رسینگک۔اوپارے کہ ہڑتوم آ ملک آتا پارلیمنٹ نا باسک آک ہڑتوم آ قوم تے خڑک اتنگ اٹ اہم ءُ کڑد اس اداکننگ کیرہ۔ پاک اوغان واپار نا سوب ہڑتوم آ ملک آتے فائدہ دوئی مریک۔ اسد قیصر پارے کہ پاکستان تدوک آ چار دہائی آن سی لکھ آن زیات اوغان باہوٹ آتا مہمانداری نا خذمت ءِ سرانجام تننگ ءِ۔ پاکستان اوغانستان تون معاشی، اقتصادی و علاقائی شونداری کن کمکاری ءِ پین مون آ دننگ خواہک۔ اوپارے کہ پاکستان اوغانستان تون اواری اٹ دہشت گردی نا چٹفنگ کن گام گیج چست کننگ نا خواہندار ءِ و ڈیہہ نا امن و شونہالی کن اواری اٹ کاریم کننگ خواہک۔ داوخت آ اوغانستان نا پندار سفیر شاکر اللہ عاطف مشال پارے کہ اوغانستان پاکستان تون تینا خڑکی دوستانہ تعلقداری تے بھاز اہمیت ایتک۔ اوپارے کہ پاکستان اوغان باہوٹ آتا ہراوڑ مہمان داری ءِ کرینے او ستاکڑزک۔ اوغانستان ڈیہہ ٹی امن کن پاکستان نا کوشست آتے قدر انا نظر اٹ ہرک۔ اوپارے کہ اوغانستان پاکستان تون اقتصادی و واپاری بشخ آتون اوار غٹ بشخ آتے ٹی کمکاری ءِ مون آ دننگ نا خواہندار ءِ۔ اوغانی سفیر پارے کہ اوغانی الس پاکستانی الس تون مہر و مابت و خیر سگالی نا جوزہ اس تخرہ۔
