اسلام آباد۔ 19 ستمبر (اے پی پی) اسپیکر قومی اسمبلی اسد قیصر چارشنبے نادے پارلیمنٹ ہاؤس اٹی پارلیمنٹری رپورٹرز ایسوسی ایشن (پی آر اے) نا ایگزیکٹو باڈی تون اوڑدہی کرے ہراٹی قومی اسمبلی سیکرٹریٹ و پی آر اے نا نیام اٹ ورکنگ ریلیشنز ءِ گچین جوڑ کننگ تون اوار اہم معاملہ غاتیا خیال آتا درشانی ءِ کننگا۔ داوخت آ اسپیکر ذرائع ابلاغ نا نمائندہ غاتون ہیت وگپ کرسا پارے کہ نن غٹ داملک انا شاری اُن ، ننا تینا تینا زمواریک ءُ ہرافتے پورو کننگ ننا قومی فرض اٹی اوار ءِ۔ اوپارے کہ داملک ارے تو نن غٹ ارین۔ ننے اواری اٹ کڑد ادا کروئی مریک۔ ذرائع ابلاغ نا اہمیت آ زور شاغسا اوپارے کہ صحافت ریاست نا چارمیکو تمبہ ءِ۔ دادے قومی شونداری کن تینا مثبت کڑد ءِ اداکروئی مرے۔ اوپارے کہ غٹ قومی معاملہ غاتے ایوان اٹی شرہ ٹی اتینہ۔ ایوان ءِ ڈیبیٹنگ کلب اس جوڑ کننگ نا جاگہ غا چاہندار آتے بٹنگسا اوفتیان ویل آتا ایسری کن سلاہ ہلینہ و عملدرآمد کرفینہ۔ دیر انا ویل آ ہیت کرسا اوپارے کہ دا ویل بے کچ تشویشناک ءِ۔ دامعاملہ غا ایوان اٹی شرہ کرفنگ تون اوار اوار چاہندار آتے ہم بٹنگنہ۔ اوپارے کہ خارجہ امور نا ویل آتے ہم ایوان اٹی شرہ ٹی اتسا سوگو خارجہ پالیسی اس جوڑ کننگک۔ اسد قیصر پارے کہ یورپ تون اوار غٹ شون ہلوک ملک آتے ٹی غٹ ویل آک پارلیمنٹ نا فورم آ ہی ایسر مریرہ۔ پارلیمانی رپورٹر آتا تربیت کن ورکشاپ نا ہم بست و بند کننگک انتئے کہ پارلیمانی رپورٹر آک ہم دا ایوان نا بشخ ءُ و اوفتیا ہم قواعد نا شرف المی ءِ۔ اسہ پین سوج اسے نا ورندی ٹی اوپارے کہ گچین کاری دھاندلی تا بابت قومی اسمبلی نا خصوصی کمیٹی کن حکومت و اپوزیشن نا غٹ پارلیمانی جماعت آتے چھٹی گدریفنگانے۔ جماعت آتا کنڈآن باسک آتا پن بننگ تون ہی قومی اسمبلی نا خصوصی کمیٹی نا پڑو ءِ کینہ۔ پارلیمانی کمیٹی ٹی 18 باسک کننگ نا سلاہ ءِ۔ بریبری وڑاٹ حکومت و اپوزیشن آن 9،9 باسک کمیٹی ٹی اوار مریرہ۔ سینیٹ ءِ کمیٹی ٹی نمائندگی تننگ نا بابت فی الوقت ہچ پاننگ خواپرہ۔ اسپیکر پارلیمانی صحافی تے مون تروک ویل آتا ہر وڑ ایسری نا یخین دہانی ہم کرفے۔
