بیجنگ۔ 17 ستمبر (اے پی پی) چین نا وزیر خارجہ نا تدوک آ ہفتہ پاکستان نا سرکاری دورہ نا وخت آ پاکستان نا سیاسی و فوجی سرکڑدہ غاتون اوڑدہی ٹی اونا جہانی معاملہ، دفاع تون اوار ڈیہہ نا سلامتی نا بابت کروک آ مذاکرات بے کچ سرسہب مسنے، دادورہ غان ہڑتوم آ ملک آتا تین پہ تینی تعلقداری تے ودفنگ اٹ کمک رسینگک۔ جہانی جریدہ گلوبل ٹائمزاٹی شینک مروک آ آرٹیکل نا رداٹ ترندی اٹ بدلینگوک آ جہانی حالیت آتے ٹی پاکستان و چین اسہ ایلو کن بے کچ اہمیت اختیار کرسا ہِننگ ءُ، جہانی سیاسی و جغرافیائی معاملہ غاتے ٹی ہم پاک چین ہڑتوم آ کنڈآتا کمکاری اہمیت تخک۔ سرحال نا رداٹ چین نا حکومت فیصلہ کرے کہ پاکستان نا پوسکن گچین مروک آ حکومت تون رابطہ کننگے و داچرجوئی ٹی چین نا وزیر خارجہ وانگ ژی بڑزکو کہول انا اسہ ڈل اسے تون اوار تدوک آ ہفتہ پاکستان نا دورہ ءِ کرے و تینا دورہ ٹی اوصدرمملکت، وزیراعظم و آرمی چیف تون اوار ایلو بڑزکو کمامدارآتون اوڑدہی کریر ہرافتے ٹی جہانی معاملہ دفاع و ڈیہہ نا سلامتی نا بابت ہڑتوم آ کنڈآتا کمکاری ءِ پین ودفنگ نا اعادہ کننگا۔ چینی وزیر خارجہ نا دورہ ٹی اوغانستان نا حالیت آتیا ہم خیال آتا درشانی ءِ کننگا ہرا بنداوی اہمیت تخک انتئے کہ اوغانستان اٹی امن آن ڈیہہ ٹی امن وایمنی نا حالیت آتے گچین جوڑ کننگ مریک۔ داوخت آ اوغانستان نا سوگوی و شونداری آہم خیال آتا درشانی ءِ کننگا ہرا چین نا جہانی ڈٹ آتا سلامتی کن المی ءِ۔ سرحال نا رداٹ چین مست آن پاکستان تون خڑکی دوستانہ تعلقداری نا رداٹ کیہی ڈٹ آتیا کاریم کننگ ءِ۔ دہشت گردی نا برخلاف جنگ اٹی نمان سرسہبی و گام گیج آتا باوجود پاکستان ءِ امریکہ نا کنڈآن کیہی ویل آتا مون تروکی ءِ وخت اس کہ ایلو کنڈ چین مدام دہشت گردی نا برخلاف پاکستان نا کارروائی تا پبی معاونت کرینے۔ تینا دورہ پاکستان اٹی چین نا وزیر خارجہ پاکستان نا کنڈآن اوغانستان و ڈیہہ نا امن و سلامتی کن کروک آ کوشست آتا ستاءِ کرے۔ اوپاکستان تون یکجہتی نا درشانی ءِ کرسا تینا دورہ ٹی کیہی وارخواہی تیا داہیت انا درشانی ءِ ہم کرے وپارے کہ پاکستان و چین گچین سنگت، گچین شریدار و گچین ہمسایہ ءُ۔ اوداعزم انا اعادہ ءِ کریر کہ چین پاکستان نا خارجہ پالیسی و جہانی معاملہ غاتا بابت پاکستان نا نقطہ نظر نا پبی مخ تفی ءِ برجاتخک۔ اوپارے کہ پاکستان چین سنگتی لازوال ءِ۔ دورہ نا وخت آ چندی بشخ آتے ٹی ہڑتوم آ کنڈآتا کمکاری ءِ پین ودفنگ آ ہم امنا کننگا ہرافتے ٹی دفاعی کمکاری، تزویراتی شریداری و مواصلات نا بشخ بنداوی اہمیت تخک۔ سرحال نا رداٹ پاکستان نا پوسکن گچین مروک آ حکومت تینا شونداری ہدف آتا دوئی کننگ کن حکمت عملی ءِ حتمی دروشم تننگ ءِ۔ چین نا وزیر خارجہ پارے کہ پاکستان نا وزیراعظم عمران خان نا نیزگاری نا چٹفنگ تون اوار ایلو شونداری پالیسی تا پبی مخ تفی ءِ کننگک۔ اوپارے کہ مذاکرات اٹی تین پہ تینی واپار ءِ متوازن جوڑ کننگ نا بابت ہم خیال آتا درشانی ءِ کننگا۔ سرحال نا رداٹ بروک آ چائنہ انٹرنیشنل امپورٹ ایکسپو (سی آئی آئی ای) آن پاکستان نا کنڈآن چین ءِ کروک آ برآمد آتا مون آ دننگ اٹ ہم کمک رسینگک ہراڑآن پاکستانی برآمد کروک آتے زیات آن زیات چینی منڈی تسکان رسینگ دوئی مریک و ہڑتوم آ کنڈآتا واپار ءِ متوازن جوڑکننگ مریک۔ اوپارے کہ نمائش اٹی پاکستان نا شرکت ننکن شرف نا سوب مریک و پاکستان کن ہم فائدہ مند جوڑ مریک۔ سرحال نا رداٹ چین نا حکومت نا کنڈآن تروک آ سلہ غا وزیراعظم عمران خان نومبر اٹی چین نا سرکاری دورہ ءِ کیک ہرا سی آئی آئی ای نا اڈتننگ نا وخت آ گمانی ءِ وخت اس کہ داوخت آ چین پاکستان اقتصادی راہداری ڈٹ آ پیش رفت نا ہم جاچ ءِ ہلنگک۔ چینی وزیر خارجہ پاکستان نا دورہ نا وخت آ وزیر خارجہ شاہ محمود قریشی اودے باوری ترفے کہ سی پیک حکومت پاکستان نا اولیت ءِ ہراڑآن پاکستان نا راجی و اقتصادی شونداری ٹی کمک رسینگک و دابھلا ڈٹ آن پاکستان نا بنداوی ڈھانچہ نا ویل آتے ہم چٹفنگ تون اوار اوار صنعتی بشخ انا پیداوار نا مون آ دننگ و جہانی اقتصادی رابطہ غاتا ودفنگ اٹی کمک رسینگک۔ سرحال اٹی پاننگانے کہ سی پیک نا بابت جہانی سازش آتا رداٹ تدوک آ ہفتہ حکومت پاکستان نا سلاہکار نا کنڈآن اسہ بے بنداو و دروغ انٹرویو دیکی میڈیا ٹی شینک کرفنگا تانکہ سی پیک و بی آر آئی ڈٹ انا بابت گڑتی ودی کننگ مرے ولے پاکستانی کمامدارآتاکنڈآن دابابت دمدستی وڑاٹ اسہ سرجم تردیدی بیان اس جاری کننگا وخت اس کہ چین ہم دا احوال آتے بے بنداو و غلط گوندا و پارے کہ پاکستان و چین نا تعلقداری وخت اتون اوار اوار سوگو مننگ ءِ و ہڑتوم آ ملک آتا حکومت آک جہانی حالیت آتا بدلی نا باوجود تینا تزویراتی تعلقداری تے پین سوگو کننگ کن سرگرم عمل ءِ۔
