اسلام آباد۔ 14ستمبر (اے پی پی) بنجائی وزیر اطلاعات و نشریات چوہدری فواد حسین پارینے کہ سی پیک اہم اقتصادی ءُ ڈٹ اسے دادے سرسہب جوڑ کرسا نشان ایتنہ و ساڑی آ حکومت دا ڈٹ ءِ پین ودفک، ففتھ جنریشن وار میڈیا نا محاذ آ کننگ انگ ءِ ، ریاستی میڈیا ءِ پوسکن آ ٹیکنالوجی و آسراتی تیان آراستہ کینہ، پی ٹی وی نا چینل آتے مرحلہ وار ایچ ڈی کننگک، پی ٹی وی و ریڈیو اکیڈمی ءِ ضم کرسا اسٹیٹ آف دی آرٹ میڈیا یونیورسٹی جوڑ کننگک، پی ٹی وی ریاستی میڈیا نا کاٹم نا تاج ءِ ، ہندن ہندن پی ٹی وی شون ہلیک ہموہمووڑ ریاستی میڈیا شون ہلیک۔ ریاستی میڈیا جہانی کہول آ پاکستان نا مثبت دروشم ءِ تالان کننگ اٹ گچین وڑاٹ کڑد ادا کننگ کیک۔ او جمعہ نا دے پی ٹی وی اکیڈمی، پی ٹی وی ، ریڈیو اکیڈمی ، ریڈیو دوستی چینل نا دورہ نا وخت آ خیال آتا درشانی ءِ کریکہ۔ بنجائی وزیر ریڈیو میوزیم نا دورہ ءِ کرے ، قائد اعظم محمد علی جناح نا کاریم اٹ اتوک آ مائیک و ایلو تاریخی ازباب آتا جاچ ءِ ہلک و ریڈیو اکیڈمی نا دنگ اٹی نیال اس ہم خلک۔ وزیراطلاعات و نشریات چوہدری فواد حسین پی ٹی وی اکیڈمی آ سرمس تو اکیڈمی نا سروک رفعت نذیر تون اوار ایلو بڑزکو کمامدارآک اودے بخیر کریر۔ بنجائی وزیر پی ٹی وی اکیڈمی نا چندی بشخ آتا جاچ ءِ ہلک و ملازم آتون اوڑدہی کرے۔
