کوئٹہ۔ 14ستمبر (اے پی پی) پشین بائی پاس آ اسسٹنٹ کمشنر نا گاڈی نا خڑک آ دھماکہ 3لیویز کارندہ شہید مسر ۔ سرجم احوال آتا رداٹ بلوچستان نا ضلع پشین اٹی بائی پاس نا خڑک آ دھماکہ مس ہراٹی سپائی عصمت اللہ ، سپائی عبدالباقی ، سپائی جعفر خان شہید مسر وخت اس کہ ڈیور تون اوار اِر ابندغ ٹھپی مسر۔ دھماکہ اسسٹنٹ کمشنر نا گاڈی نا خڑک آ مس ہرا موٹرسائیکل نا کمک اٹ کننگا، دھماکہ خیز مواد موٹرسائیکل اٹ تخوک ئسر ہرا اسسٹنٹ کمشنر نا گاڈی نا خڑک بننگ تون زور دار دھماکہ اٹ ترخا۔ پولیس نا رداٹ دھماکہ ٹی اسہ گاڈی اسے نسخان رسینگا وخت اس کہ دھماکہ ٹی ٹھپی مروک آ 3کارندہ شہید مسر و 2بھاز ٹھپی ءُ ہرافتے طبی امداد کن کوئٹہ غا گدریفنگ انگ ءِ دھماکہ نا وخت آ اسسٹنٹ کمشنر گاڈی ٹی ہلوکہ۔ دھماکہ غان پد پولیس و لیویز نا بھلو نفری اس علاقہ غا سرمرسا واقعہ نا جاگہ ءِ بند کریر وخت اس کہ لیویز ہم سرچ آپریشن نا بناءِ کرینے۔ پولیس نا رداٹ دھماکہ خودکش ئس ، ریموٹ کنٹرول نا کمک اٹ کننگا۔ اونا نوعیت ءِ ہُننگ کن بمب ڈسپوزل اسکواڈ ءِ بٹنگ انگانے ۔ دھماکہ غان پد خڑک انا ہسپتال اٹی ہم سیکورٹی ءِ ہائی الرٹ کننگانے وخت اس کہ پشین بائی پاس ءِ ہن و بر کن بند کننگانے۔
