اسلام آباد۔ 14ستمبر (اے پی پی) وزیراعظم عمران خان پارینے کہ بدلی اکن ننے نوآبادیاتی ذہنیت آن پیش تمنگ و آقا و غلام نا طرز حکمرانی بدل کروئی مریک۔ قوم ءِ وام تا کلاسیکی دوتیان کشنگ کن سیاست دان ، بیوروکریسی و الس ءِ تینے بدلیفوئی مریک ، دنیا ٹی ہچ ءُ دُن ءُ گڑاس اف کہ مننگ کپ، بدلی ہمووخت آ بریک ہراتم نن الس نا خراج آتیان مچ مروک آ اسہ اسہ روپئی نا خڑچ انا احساس مرے، وزیراعظم ہاؤس نا 100 انا خڑک گاڈی، 4ہیلی کاپٹر، 6 ڈگی تا نیلامی علامتی ءُ گام گیج اسے تانکہ نن نوآبادیاتی ذہنیت آن پیش تمن، بیوروکریسی آن بیدس نن اصلاحات نا پروگرام ءِ مون آ دننگ کپنہ، سول سرونٹس نا سیاسی وابستگی کنکن ہچ ءُ ویل اس اف۔ حکومت نا ویل کارکڑد انا ءِ، سول سرونٹس اسلوب حکمرانی نا گچینی کن چانسز ہلیر ، غلطی مریک ولے غلطی مننگ و مالیاتی دُزی نا نیام اٹ پرخ کروئی مرے، نن پورو زورخلینہ کہ نمے سیاسی نیام تمنگ و زور آن آجو کین و نمے شرف ملے، بیوروکریسی و سرکاری ملازم آتاتنخواک جوان افس، اگہ نن دا سسٹم ءِ سہی کرین تو تنخواہ دار تپہ کن ہنداخہ در آسودہی مریک کہ ولدا اوفتے تینا چناتے آب اٹ تعلیم نا فکر مفک، اِرا سال گزارہ کننگ نا فیصلہ کیر تو ملک اٹی ہنداخہ پیسہ بریک کہ داڑے کڑز و بے روزگاری نا ویل مفک و پاکستان زرکاری و سیل و سواتی تے کن اہم ءُ بنجااس مریک۔ جمعہ نادے داڑے وزیراعظم آفس اٹی سول سرونٹس آن تران کرسا وزیراعظم عمران خان پارے کہ اینو پاکستان ءِ اخس کہ چینلج مون تروک ءُ مستین اٹی اونا مثال ءِ پیش کننگ مفک۔
