اسلام آباد۔ 14ستمبر (اے پی پی) پارلیمنٹ نا ہڑتوم آ ایوان نا اسیجا دیوان دوشنبے نا بیگہ 4بجہ غا مریک ہراڑآن صدر مملکت ڈاکٹر عارف علوی تران کیک۔ دیوان نا کماشی ءِ اسپیکر قومی اسمبلی اسد قیصر کیک۔ قومی اسمبلی سیکرٹریٹ صدارتی تران نا وخت آ غٹ بست و بند آتے گڈیکو دروشم تسنے۔ داوخت آ خصوصی سلہ نامہ غان بیدس ہچ گہس ءِ پارلیمنٹ نا دنگ اٹی پترینگ انگ نا موکل مفک۔ پارلیمنٹ نا پترینگوک آ کسر و ایب و کیب اٹی سخت رکھی گام گیج کننگک۔ دیوان آن مست غٹ پارلیمانی جماعت آتا پارلیمانی پارٹی تا دیوان اڈ ہلیک ہرافتے ٹی صدارتی تران نا وخت آ پارلیمانی جماعت آک تینا تینا حکمت عملی ءِ گڈیکو دروشم اس ایترہ۔ یات سلے کہ 25جولائی آ لس گچین کاری تیٹی گچین مروک آ قومی اسمبلی آن صدر مملکت نا دا اولیکو تران مریک اوکان پد ساڑی آ قومی اسمبلی نا پارلیمانی سال انا باقاعدہ بناء مریک۔
