اسلام آباد۔ 11ستمبر (اے پی پی) ڈپٹی اسپیکر قومی اسمبلی محمد قاسم خان سوری پارینے کہ پاکستان وت واجہ ءُ ملک اسے، امریکہ تون اوار غٹ جہانی واک آتون بریبری نا بنداو آ تعلقداری استوار کننگ نا خارجہ پالیسی اس ٹہیفک، داسہ ڈومور والا حالیت آک افس، امن ہی اسٹ انگا کسر ءِ، ہراڑآن ڈیہہ ٹی شونداری مریک و معیشت نا پہیہ مون آ چلینگک، پاکستان ایلوفتا جنگ اٹی حصہ دار مفک۔ سے شنبے نادے داڑے ’’جہانی امن‘‘ نا بابت امریکہ نا مسلمان آتون تعلقداری و نائن الیون آن پد حالیت آتیا اڈ ہلوک آ سیمینار آن تران کرسا اوپارے کہ نائن الیون آن پد مسلمان تیا انتس گدرینگا ہرانا ننا راج آ دوررس نتیجہ مرتب مس۔ اوپارے کہ نائن الیون آن پد امریکہ اوغانستان آ چڑھائی کرے و پاکستان آ زور شاغا و اودے تینا کولیشن پارٹنر جوڑ کرے۔ امریکہ اوغانستان آ جنگ مسلط کرے و ننے زور انا رداٹ سیوتی جوڑ کرے و ننے ایلو نا جنگ اٹ بٹے ہراڑآن ننا راج بھس مس ، خلقت شہید مس، انفراسٹرکچر ءِ نسخان رسینگا ، قبائلی ضلع غاک بمباری آن بھس ءُ۔ ننا ارب آ ڈالر نسخان مس ہرافتیان ننے کولیشن سپورٹ فنڈ انا 15درسد ہم تننگتو۔ پی ٹی آئی نا حکومت ملک اٹی رہینگوک آ غٹ خلقت نا حق انا رکھ ءِ کیک و نن کرپشن ءِ چٹفنہ۔ اوپارے کہ قائد اعظم نا اصول آتیا چلینگسا نن پاکستان ءِ عظیم تر ملک اس جوڑ کینہ۔
