اسلام آباد۔ 11ستمبر (اے پی پی) چیئرمین سینیٹ محمد صادق سنجرانی پارینے کہ قائد اعظم محمد علی جناح ؒ نا کوشست آتیان قیام پاکستان نا تغ پورو مس۔ قائد اعظم محمد علی جناح ؒ نا 70 می برسی نا وخت آ قوم انا پن کلہو اٹی اوقائد پاکستان نا خذمت آتے خراج عقیدت پیش کرسا پارے کہ محمد علی جناح ؒ مدام ہرمشکل نا مون آ سلیس و وخت اس ہم اصول آتیا سودابازی کتو و نئے تینا فیصلہ ءِ کس اسے آ مسلط کننگ نا کوشست کرے۔ محمد علی جناحؒ مدام نظم و ضبط ، آجوئی ، جمہوریت ، کانود نا حکمرانی و راجی انصاف نا راہشون اصول آتیا ثابت قدم سلیس۔ چیئرمین سینیٹ پارے کہ قائد اعظم محمد علی جناح ؒ نا پاکستان کن ننے پین خواری و عملی جہد کروئی مریک تانکہ مملکت پاکستان اسہ شونہال و شرحالی ریاست اس جوڑ مننگ کے۔ قائد اعظم ؒ نا سرسہبی قوم تا جہد آجوئی نا تاریخ نا اسٹ انگا واقعہ ئس ہرا عدم تشدد و اصول آتیا سختی اٹ سلنگ آن ظہور پذیر مس۔ محمد صادق سنجرانی پارے کہ قائد اعظم محمد علی جناح ؒ نا راہشون اصول ایمان ، سیوت و تنظیم نئے بیرہ ننا تاریخ نا بشخ ءِ بلکن داڑآ عمل کرسا ملک و قوم اکن گچینی و شونہالی اتنگ مریک۔ پاکستان ءِ مون تروک چیلنج آتا مقابلہ ءِ تینا صف آتے ٹی سیوت ودی کننگ آن کننگ مریک ۔ اوپارے کہ نن بایدے عہد کین کہ نن تینا وطن پاکستان ءِ مون تروک چیلنج آتا ڈٹ کر مقابلہ ءِ کینہ و پاکستان ءِ گچین و سوگو ملک اس جوڑ کننگ کن ہر وڑگام گیج کینہ۔
