وزیراعظم عمران خان گوازی تا تنظیم تا کارکڑد ناجاچ ءِ ہلنگ، گوازی تا بشخ اٹی انتظامی اصلاحات کن سفارشات مرتب کننگ نا چرجوئی ٹی احسان مانی نا کماشی ٹی ٹاسک فورس انا جوڑ کننگ نا پرمان جاری کرے

اسلام آباد۔ 11ستمبر (اے پی پی) وزیراعظم عمران خان گوازی تا تنظیم تا کارکڑد نا جاچ ءِ ہلنگ و گوازی تا بشخ اٹی انتظامی اصلاحات کن سفارشات مرتب کننگ نا چرجوئی ٹی ٹاس فورس اس جوڑ کننگ نا پرمان جاری کرینے۔ اوداپرمان ءِ سے شنبے نادے داڑے وزیراعظم آفس اٹی بین الصوبائی رابطہ نا وزارت نا اسہ بریفنگ اسے نا کماشی ءِ کرسا جاری کرے۔ بنجائی وزیر بین الصوبائی رابطہ ڈاکٹر فہمیدہ مرزا، چیئرمین پاکستان کرکٹ بورڈ احسان مانی و ایلو سینئر سرکاری کارندہ غاک ہم دیون اٹی ساڑی ئسر۔ وزارت بین الصوبائی رابطہ نا سیکرٹری جمیل احمد وزیراعظم ءِ وزارت و اوڑتون گنڈوک محکمہ بشمول پاکستان اسپورٹس بورڈ، پاکستان کرکٹ بورڈ، انٹر بورڈ کمیٹی آف چیئرمین ، پاکستان ویٹرنری میڈیکل کونسل، نیشنل اکیڈمی آف پرفارمنس آرٹس، و نیشنل انٹرن شپ پروگرام نا کارکڑد و کاریم نا باروٹ بریفنگ تس۔ وزارت کن بجٹ نا تخصیص و ملک اٹی گوازی تا مون آ دننگ کن چندی شونداری اسکیم تیا شرہ ٹی وزیراعظم ءِ معلومدار کننگاکہ چندی اہم ڈٹ، ہرافتا مالیت ارب آ روپئی ءِ، 2008 ء آن نا بے پورو ءُ و دا اسکیم تا فزیکل انفراسٹرکچر اٹی معمولی پیش رفت مننگ کرینے۔ وزیراعظم پارت کرے کہ غٹ پدسلوک ڈٹ آتا پوسکنی آن جاچ ءِ ہلنگے تانکہ اوفتاافادیت و داوخت اسکان بے پوروی نا سوب آتا تعین ءِ کننگ مرے۔ وزیراعظم پارت کرے کہ قومی انٹرن شپ پروگرام کون آ گام گیج آتے پین سوگو کننگے و ورناگریجویٹس آتے کن زیات آن زیات وارخواہی فراوان کننگے تانکہ او چندی بشخ آتے ٹی عملی تربیت دوئی کننگ کیر۔ وزیراعظم ءِ نیشنل پیرالمپک کمیٹی نا کارکڑد نا بارواٹ ہم بریفنگ تننگا۔ وزیراعظم داوخت اسکان نیشنل پیرالمپک کمیٹی نا پیش رفت آ است جمی نا درشانی ءِ کرے۔