اسلام آباد۔ 10 ستمبر (اے پی پی) پاکستان تحریک انصاف نا حکومت نا کنڈآن 50 لکھ اُراتا جوڑ جاڑ نا پنچ سالہ ڈٹ و ڈول ءِ عملی جامہ اس بیرفنگ نا چرجوئی ٹی وزیراعظم عمران خان نا کماشی ٹی بڑزکو کہولی دیوان ٹی فیصلہ کننگانے کہ وزیراعظم تینٹ دا اہم پروگرام نا اونر شپ ءِ ہلیک وخت اس کہ وزیراعظم تعلقدار کمیٹی ءِ پک سلاہ و سوج بروک آ اِرا ہفتہ ٹی پیش کننگ نا پارت تانکہ پروگرام نا زوت آن زوت پڑو ءِ کننگ مرے۔ دوشنبے نادے اڈ ہلوک آ دیوان اٹی وزیراعظم ءِ سیکرٹری ہاؤسنگ نا کنڈآن وزیراعظمءِ ہاؤسنگ کمیٹی نا کنڈآن داوخت اسکان پیش رفت آ سرجم احوال تننگا۔ سیکرٹری ہاؤسنگ وزیراعظم ءِ ملک اٹی اُراتا ساڑی آ حالیت و سالانہ طلب آن معلومدار کرے۔ پنجا لکھ اُراتا جوڑ جاڑ نا بابت درکار ڈغار، جوڑ جاڑ کن درکار وسیلہ غاتا فراوانی نا بابت کیہی آپشن و پروگرام ءِ عملی جامہ اس بیرفنگ کن پرائیویٹ سیکٹر و درملکی زرکار آتے درکار آسراتی نا فراوانی کن انتظامی کہول آ و تعلقدار کانود اٹی ترمیم آتا بابت ہم سرجم احوال تننگا۔ داوخت آ وزیراعظم پارے کہ پنجا لکھ اُراتا جوڑ جاڑ پی ٹی آئی حکومت نا ایجنڈا نا اہم ءُ جزو اسے۔ حکومت بے اُرا بندغ آتے اُراتا فراوانی نا وعدہ ءِ پورو ی کن پرعزم ءِ۔ اوپارے کہ 50 لکھ اُراتا جوڑ جاڑآن نئے بیرہ ملک اٹی بے اُرا بندغ آتا ہنکین نا ویل ایسر مریک بلکن داڑآن لکھ آ بے روزگار بندغ آتے نوکری دوبریک و ہاؤسنگ سیکٹر اتون گنڈوک صنعت آتے شون ملک۔ اوپارے کہ ملک انا کنڈ کنڈ اٹی واقع سرکاری ڈغار تیان بیدس پنجاب و خیبر پختونخوا نا گیسٹ ہاؤس و ایلو سرکاری ماڑی تا ارب آ روپئی نا ڈغار تے کاریم اٹ اتسا ہاؤسنگ پروگرام کن خاطر خواہ مالی وسیلہ یکجا کننگ مریک۔
