اسلام آباد۔ 10 ستمبر (اے پی پی) وزیراعلیٰ بلوچستان جام کمال خان و وزیر مملکت داخلہ شہریار آفریدی پارینو کہ ایران آ ہنوک آ زائر آتے پورو رکھ فراوان کننگک، بنجائی حکومت بلوچستان نا ویل آتے ایسر کننگ کن سنجیدہ ءِ و بھاز کمک کننگ ءِ، الس ءِ بدلی نظر بریک، داسہ محرومی تے چٹفنگ نا وخت بسنے۔ او دوشنبے نادے آ بلوچستان ہاؤس اٹی اسیجاپریس کانفرنس آن تران کریرہ۔ داوخت آ ڈپٹی اسپیکر قاسم سوری و بلوچستان آن تعلق تخوک آ چندی سینٹر آک ہم ساڑی ئسر۔ وزیراعلیٰ بلوچستان جام کمال پارے کہ بلوچستان نا ویل آک بھاز زیات ءُ، محرم الحرام اٹی زائر آتا بھلو کچ اس ایران آ کاہک دا بابت کیہی ناخوشگوار واقعہ پیش بسنے ہرانا سوب دا ویل دمدستی چکاری ئس و نن بنجائی حکومت خاص کر وزیراعظم عمران خان نا منت وار اُن کہ او دا ویل آ دمدستی وڑاٹ بڑزکو کہولی کمیٹی اس جوڑ کرے و وزیر مملکت داخلہ ءِ بلوچستان آ ہِننگ نا ٹاسک تس ہراڑآ او تفتان بارڈر اسکان ہنا و حالیت آتا سرجم جاچ ءِ ہلک، کوئٹہ ٹی بڑزکو کہولی دیوان اس ہم کرے ہراٹی ہزارہ کمیونٹی ، سیاسی سرکڑدہ و کانود نافذ کروک آ ادارہ غاتا بڑزکو کمامدارآک ہم ساڑی ئسر۔
