اسلام آباد۔ 10 ستمبر (اے پی پی) اسپیکر قومی اسمبلی اسد قیصر نا کماشی ٹی دوشنبے نادے پارلیمنٹ ہاؤس اٹی انفارمیشن ٹیکنالوجی و ای گورنمنٹ نا بابت دیوان اس مس ہراٹی قومی اسمبلی سیکرٹریٹ و انفارمیشن ٹیکنالوجی بورڈ انا بڑزکو آفیسر آک ساڑی ئسر۔ دیوان اٹی اسپیکر ءِ انفارمیشن ٹیکنالوجی بورڈ ای گورنمنٹ نا بارواٹ احوال تس۔ اسپیکر قومی اسمبلی داوخت آ ہیت وگپ کرسا پارے کہ ننے دنیا تون اوار اواری اٹ چلینگوئی ءِ ہنداخاطرآن ٹیکنالوجی نا پوسکن آ گرج آتا رداٹ چلینگوئی مریک۔ ای گورنمنٹ نا کاریم اٹ اتنگ آن کارکڑد ءِ گچین جوڑ کننگ مریک و وختءِ بچفنگ مریک۔ اوپارے کہ خیبر پختونخوا اسمبلی ٹی بحیثیت اسپیکر او ای ٹیکنالوجی ءِ جاری کرفے ہرانا خاطر خواہ نتیجہ دوئی مس۔ قومی اسمبلی سیکرٹریٹ اٹی ہم داٹیکنالوجی ءِ مون آ دننگے۔ قومی اسمبلی سیکرٹریٹ نا کنڈآن دیوان ءِ پاننگاکہ اسمبلی سیکرٹریٹ اٹی ای گورنمنٹ نا اجراء مسنے و سیکرٹریٹ نا بڑزکو آفیسر و عملہ ءِ داٹیکنالوجی نا تربیت ہم تننگانے۔ اسپیکر قومی اسمبلی پارت کرے کہ ای گورنمنٹ نا بابت کاریم ءِ ترند و گچین جوڑ کننگے ہراڑآ کاغد آ بروک آ خڑچ آتے ٹی کمتی و کفایت شعاری ءِ مون آ دننگک ہر ا ساڑی آ حکومت نا اولیت ءِ۔ انفارمیشن ٹیکنالوجی بورڈ انا کمامدارآک اسپیکر ءِ باوری ترفیر کہ قومی اسمبلی سیکرٹریٹ ءِ پوسکن آ گرج آتیان ہم گرج جوڑ کننگک۔
