اسلام آباد۔ 10 ستمبر (اے پی پی) خیبر پختونخوا نا قبائلی ضلع غاتا عارضی وڑاٹ بے اُرا مروک آ بندغ آتا ہند آتا سروے نا عمل برجاءِ، داوخت اسکان 83 ہزار اُراتا سروے نا عمل ءِ پورو کننگانے وخت اس کہ 48 ہزار ہند آتا معاوضہ ءِ تننگانے ۔ بحالی و پوسکن جوڑ جاڑ نا پروگرام منیجر شکیل اقبال دوشنبے نادے’’اے پی پی‘‘ ءِ پارے کہ خیبر پختونخوا نا قبائلی ضلع غاتا آپریشن ضرب عضب اٹی زہمی مروک آ عارضی وڑاٹ بے اُرا مروک آبندغ آتا ہندآتا سروے نا عمل برجاءِ۔ داوخت اسکان 83 ہزار ہند آتا سروے ءِ پورو کننگانے۔ اوپارے کہ عارضی وڑاٹ بے اُرا مروک آ بندغ آتا ہند آتا سروے نا عمل اینخو نا سال دسمبر اسکان برجاسلک۔ اوپارے کہ داوخت اسکان 48 ہزار ہند آتا معاوضہ تننگانے وخت اس کہ ایلو ماندہ ہند آتا معاوضہ غاتا تننگ نا عمل برجاءِ۔ اوپارے کہ پورو وڑاٹ بھس مروک آ اُرا نا معاوضہ چار لکھ روپئی ءِ وخت اس کہ جزوی وڑاٹ زہمی مروک آ اُرا تا معاوضہ اسہ لکھ 60 ہزار روپئی تننگ انگ ءِ۔
