جہانی برادری مقبوضہ کشمیر اٹی کودک و معصوم کشمیری تیا برجاءبھارتی بیدادی نا نوٹس ئِ ہلے، تنازعہ کشمیر ئِ اقوام متحدہ نا قرارداد آتارداٹ ایسر کرفنگ اٹی تینا کڑد ئِ ادا کے
اسلام آباد۔ 05جنوری (اے پی پی) وزیراعظم محمد نواز شریف جہانی برادری آ زورشاغانے کہ او مقبوضہ کشمیر اٹی کودک و معصوم کشمیری تیا برجاءبھارتی بیدادی نا نوٹس ئِ ہلے و تنازعہ کشمیر ئِ اقوام متحدہ نا قرارداد آتا رداٹ ایسر کرفنگ اٹی تینا کڑد ئِ ادا کے، پاکستان کشمیری تا سیاسی، سفارتی و اخلاقی مخ تفی ئِ برجاتخک۔ او پنچ شنبے آ داڑے وزارت خارجہ امور نا اواری اٹ ینگ پارلیمنٹرین فورم نا کنڈآن کشمیر نا بارواٹی اِرا دے ئی جہانی پارلیمانی سیمینار نا بنائی دود آن تران کریکہ۔ وزیراعظم کشمیر نا بابت جہانی پارلیمانی سیمینار نا اڈتننگ ئِ بروخت گوندسا پارے کہ کشمیر پاکستان نا درستی نا جزولاینفک ئِ، ننا است کشمیری تتون اوار دھڑکک، نن اوفتا خوشی اٹ خوش و اوفتا غم اٹ غمزدہ مرینہ۔ اوپارے کہ کشمیر ئِ ہشنگسا ہلنگ کپنہ ، دنیا بھارت ئِ داپائے کہ بھاز مسنے۔ وزیراعظم پارے کہ جہد آجوئی کشمیر اٹی کشمیر ی تا ورنانسل اسہ پوسکن ئُ باب اس نوشتہ کرینو۔ برہان وانی نا شہیدی آن پد کشمیری تا جہد آجوئی ٹی پوسکن ئُ ولولہ اس ودی مسنے، دا کشمیری تا تینا جہد ئِ، پاکستان کشمیری تا ہمیشہ سیاسی سفارتی و اخلاقی مخ تفی ئِ کرینے۔ نن پین وخت اس ہم دا مخ تفی ئِ برجاتخنہ تانکہ کشمیری تا حق خودارادیت نا دوئی ممکن مننگ کے۔ اوپارے کہ کشمیر اٹی انتس کہ مننگ ئِ و بھارتی فوج ہرابیدادی ئِ کشمیر نا کودک ومعصوم الس آ کننگ ئِ ، جہانی برادری ئِ داکنڈاچکار کروئی مرے۔ اوپارے کہ پاکستان تینا غٹ ہمسایہ غاتون پرامن تعقلداری نا خواہندار ئِ۔ اواقوام متحدہ نا جنرل اسمبلی نا پلیٹ فارم آستمبر 2015ءٹی تینا پیش کروک چار ٹکی ایجنڈا نا ذکر ئِ کرے ہرا کشمیر نا ویل انا ایسری نا احاطہ ئِ کیک۔ وزیراعظم پارے کہ او اقوام متحدہ نا جنرل اسمبلی نا دیوان اٹی ستمبر 2016ءٹی ہم جہانی برادری نا توجوہ تنازعہ کشمیر نا ایسری نا گرج و کشمیری الس آ کروک آ بیدادی نا کنڈا مبذول کرفیسس و داڑآ سرجم خیال آتا درشانی ئِ کریسس۔ اوپارے کہ جہانی برادری ئِ بایدے مرے کہ بھارت ئِ پائے کہ مقبوضہ کشمیر اٹی بھاز مسنے۔ ہفت دہائی تیان مقبوضہ کشمیر اٹی سم تا تڑتڑاہٹ بِننگ انگ ئِ۔ کشمیر ٹی داسہ بیدادی ئِ بند کرسا سویلی ایشیانا ڈیہہ نا الس کن ہم ہموجوڑجاڑ و شونداری آ چکار کننگے ہراڑآن دنیا ن ایلو ڈیہہ غاتا الس مستفید مننگ ئِ۔ جہانی برادری کشمیری تے اوفتا حق خودارادیت ترفنگ کن تینا کڑد ئِ ادا کے و داچرجوئی ٹی اقوام متحدہ نا قرارداد آتیا عمل کرفنگے۔ اوپارے کہ کشمیری کیہی نسل آتیا کروک آ بھارتی بیدادی داسہ بایدے بند مرے۔ سیمینار نا اڈتننگ آ کشمیر الس ئِ داصفا کلہو کائک کہ نن اوفتے تون ہم کوپہ سلوک اُن۔ وزیراعظم پارے کہ پاکستان ہر جہانی فورم آ کشمیر نا ویل ئِ تالان کرسا کیک ۔ اوپارے کہ ساڑی ہی ٹی پارلیمان ناباسک آتے پیشن نا ملک تینا نمائندہ غاتاوڑاٹ گدریفنگاسس تانکہ دنیا ئِ مقبوضہ کشمیر نا الس ناحالیت زار نا بارواٹی معلومدار کننگ مرے۔ آزاد کشمیر نا صدر مسعود خان ، وزیراعظم راجہ فاروق حیدر ، وزیر دفاع خواجہ آصف ہم دود اٹی ساڑی ئسر وخت اس کہ یورپ و قطبی امریکہ آن کشمیر نا بارواٹی دانشورآک ہم دود اٹی ساڑی ئسر۔
