اسلام آباد۔08 ستمبر(اے پی پی)پاکستان ءُُ چین ءَ جزم ءِ درشان کت کہ میاں اوستمانی جیڈھ آنی سر ءَ پاکستان ءُُ چین یک ءِ دومیگ ءِ گوما سرجمیں کمک ءَ جاڑی دار اَنت، سی پیک منصوبگ چینی صدر ءِِ ون بیلٹ، ون روڈ ءِ آدینک اِنت وھدیکہ وزیر ءِ درئی کار شاہ محمود قریشی ءَ گوشت کہ پاکستان جزمیگ اِنت کہ آ وتی سرزمین ءَ اِچ رنگیں ناشرکاری ءِ واستہ کارمرد بوھگ ءَ نئیل اَنت۔ شمبے ءِ روچ ءَ پاکستان ءِ تر ءُُ تاب ءِ ساھت ءَ چین ءِ وزیر ءِ درئی کار وانگ ڑی ءَ درئی کارانی دپتر ءِ تر ءُُ تاب کت۔ اے موہ ءِ سر ءَ وزیر ءِ درئی کار شاہ محمود قریشی ءَ آئی ءَ را وش اتک کت۔ دوئیں ھمکار آنی نیام ءَ گند ءُُ نند ھم بوت ایشی ءِ تہءَ دو نیمگی ھیال ریچی کنگ بوت۔ ایشی ءَ چہ پد یکجائی پریس کانفرنس ءِ ساھت ءَ وزیر ءِ درئی کار شاہ محمود قریشی ءَ گوشت کہ وانگ ڑی پاکستان ءِ کوھنیں دوست اِت ءُُ آئی ءَ مُدام پاکستان ءِ کمک کتگ۔ آئی ءَ گوشت کہ چین ءِ درئی کارانی وزیر پاکستان ءِ تر ءُُ تاب ءِ ساھت ءَ صدر، مزن وزیر ءُُ آرمی چیف ءَ گوں گند ءُُ نند کنت۔ چینی درئی کارانی وزیر ءَ نومبر ءَ مزن وزیر عمران خان ءَ را چین ءِ تر ءُُ تاب کنگ ءِ دعوت داتگ وھدیکہ پاکستان ءَ ھم چین ءِ صدر ءُُ مزن وزیر ءَ را پاکستان ءِ تر ءُُ تاب کنگ ءِ دعوت داتگ۔ شاہ محمود قریشی ءَ گوشت کہ چینی ھمکار ءِ گوما گند ءُُ نند ءِ ساھت ءَ دو نیگمی ءُُ میاں اوستمانی جیڈھ آنی سرءَ گپ ءُُ تران بوتگ۔ آئی ءَ گوشت کہ سی پیک پاکستان ءُُ پڑ ءِ واستہ ارزشتی انت، سی پیک ءَ گوں بندوکیں چینی شہری آنی رکھینگ ءُُ سلامتی اولی ترجی اِنت۔
