اسلام آباد۔ 07 ستمبر (اے پی پی) پاک بحریہ نا سروک ایڈمرل ظفر محمود عباسی پارینے کہ نیوی ڈے (8 ستمبر) ننا قومی تاریخ نا ہمو روشن ءُ بشخ اسے نا یات ترفک ہراتم پاک بحریہ نا آفیسر و ورناتے بلند حوصلہ و بدل مفروک عزم دشمن نا قبیح تغ تے چورہ چورہ کرے و اوفتا ناپاک ارادہ غاتے مش تا گواچی کرے۔ جیرت و دلیری اٹ عبارت ’’ آپریشن سومنات‘‘ نا کمک اٹ پاک بحریہ دوارکا ٹی واقع بھارتی ریڈار اسٹیشن آ جلہو کرے و جنگ انا بناہی نفسیاتی برتری دوئی کرے و اوکان پد پاک بحریہ نا آبدوز غازی مچ آ جنگ اٹی بلاحجت تینا برتری ءِ قائم تخار۔ پاک بحریہ نا دا برتری بھارتی بحری بیڑہ بشمول بھارتی جہاز بردار بحری جہاز ءِ اونا تینا بندرگاہ تیٹی ہی مقید کریر۔ یوم بحریہ نا بابت تینا کلہو اٹی پاک بحریہ نا سروک پارے کہ پاک بحریہ نا غازی و جنگ اٹی بھلا کارنامہ غاتے انجام تروک آ آفیسر و ورناتا شجاعت و جیرت ءِ خراج تحسین پیش کننگ کن پاک بحریہ ہر سال دادے ءِ اڈ ایتک ہرافتا عالی ہمت، دلیری و قربانیک ننے ٹی پوسکن ءُ جوزہ و ناقابل شکست عزم ءِ تالان کیرہ۔
