الیکشن کمیشن اسہ وت واجہ ءُ آئینی ءُ ادارہ اسے ہرا داوڑنا زور ءِ منپک، الیکشن کمیشن آف پاکستان
اسلام آباد۔ 07 ستمبر (اے پی پی) الیکشن کمیشن کمیشن نا استیفہ تننگ نا بابت مولانا فضل الرحمان نا بیان ءِ غیر زموارانہ گوندسا پارینے کہ الیکشن کمیشن اسہ وت واجہ ءُ آئینی ءُ ادارہ اسے ہراداوڑنا زور ءِ منپک، کمیشن دا خواست ءِ یکسر مسترد کرسا سختی اٹ دانا مذمت ءِ کرینے۔ جمعہ نادے الیکشن کمیشن نا کنڈآن جاری بیان اٹی پاننگانے کہ گڑاس اخبار آتے ٹی مولانا فضل الرحمان تون منسوب غیر زموارانہ بیان کہ’’ الیکشن کمیشن استیفہ ایتے‘‘ آ الیکشن کمیشن است ہسونی نا درشانی ءِ کرینے و داخواست ءِ یکسر مسترد کرسا سختی اٹ مذمت ءِ کرینے۔ الیکشن کمیشن پارے کہ صاف و شفاف و غیر جانبدارانہ گچین کاری 2018 ء نا بارواٹ بیدس شاہدی نا داوڑنا بیان آک است ہسون و حق آتا برعکس ءُ۔ گچین کاری 2018 ء ٹی الس آزادانہ چاگڑد اٹی تینا حق رائے دہی ءِ کاریم اٹ ایس، و پاکستانی الس نا مینڈیٹ نا بیدس سوب و جندی فائدہ غاتا بنداو آ شرف ءِ کپننگ جمہوریت نا بنداوی اصول آتا منافی ءِ۔
