کوئٹہ۔ 06ستمبر (اے پی پی) وزیراعلیٰ بلوچستان جام کمال خان پارینے کہ پاکستان گدرینگوک آ پانزدہ سال اٹی سخت انگا امتحان آ ن گدرینگا امن نا بحالی کن شہید آتا بے شمار قربانیک ءُ و ہمو ہی قربانی تا سوب اینو بلوچستان ، فاٹا و کراچی ٹی امن ءِ، 6 ستمبر ملکی تاریخ نا اہم ءُ دے اسے ہرا ننے شہید آتا لازوال قربانی تا یات ترفک۔ داخیال آتا درشانی ءِ او 6 ستمبر نا بابت کوئٹہ کینٹ اٹی شہید آتا خاہوت آتون اوڑدہی آن پد میڈیا تون ہیت وگپ کرسا کرے۔ داوخت آ کمانڈر سدرن کمانڈ لیفٹیننٹ جنرل عاصم سلیم باجوہ ، وزیر داخلہ سلیم احمد کھوسہ، آئی جی ایف سی میجر جنرل ندیم انجم ، صوبائی وزیر آتون اوار بڑزکو سول و فوجی کمامدار آک ہم ساڑی ئسر۔ وزیراعلیٰ پارے کہ شہید آتا قربانی تا سوب اینو امن مسنے و بلوچستان اٹی زند انا معمول بحال ءِ۔ سیکورٹی فورس آک امن کن لازوال قربانی تسنو۔ شہید آتا خاہوت آتے تنیا الیپنہ و تعلیم و روزگار تون اوار شہید آتا وارث آتا غٹ ویل آتے ایسر کینہ۔ وزیراعلیٰ پارے کہ شہید آتا خاہوت آتے معاوضہ تننگ نا پالیسی تا اول سرآن جاچ ءِ ہلسا اوفتے گچین جوڑ کننگک، اوپارے کہ مستین اٹی گورننس آ چکار کننگتو ہرانا سوب ویل ودی مس ننا کوشست ءِ کہ گڈ گورننس اس جوڑ کرسا الس ءِ مون تروک ویل آتے ایسر کننگے، الس نا جان و مال انا رکھ ریاست نا زمواری ءِ و دازمواری تون گچین وڑاٹ مون تننگ کن غٹ دستیاب وسیلہ غاتے کاریم اٹ اتنگ اُن۔ داکان مست وزیراعلیٰ بلوچستان جام کمال کمانڈر سدرن کمانڈ لیفٹیننٹ جنرل عاصم سلیم باجوہ تون اوار یادگار شہداء آ حاضری تس ، پھل شاغا و شہید آتا درجہ غاتا بڑزی کن دعا کرے۔ داوخت آ صوبائی وزیر آک، بڑزکو سول و فوجی کمامدارآک ہم ساڑی ئسر ۔ اوکان پد وزیراعلیٰ بلوچستان و کمانڈر سدرن کمانڈ شہید آتا وارث آتون اوڑدہی کرے و اوفتا ویل آتے بِنگ۔
