اسلام آباد۔ 06ستمبر (اے پی پی) پاکستان و ترکی چندی بشخ آتے ٹی اواری اٹ کاریم کننگ و ہڑتوم آ کنڈآتا تعلقداری تے پین سوگو جوڑ کننگ آ امنا کرینو، دا امنائی پنچ شنبے نادے داڑے بنجائی وزیر انسانی حق ڈاکٹر شیریں مزاری و پاکستان اٹی جمہوریہ ترکی نا سفیر مصطفی یردکل نا نیام اٹ اوڑدہی ٹی طے مس۔ اوڑدہی ٹی وزارت انسانی حق انا بڑزکو کمامدارآک ہم ساڑی ئسر۔ اوڑدہی ٹی ہڑتوم آ ملک آتا نیام اٹ تین پہ تینی کمکاری، ہڑتوم آ کنڈآتا تعلقداری و ایران۔ پاکستان۔ترکی نا سہ کڑدہ ہی تعلقداری تیا ہم خیال آتا درشانی ءِ کننگا۔ اوڑدہی ٹی کڑدہ غاک اسہ ایلو ءِ مشترکہ سیاسی آزموندہ غاتیان معلومدار کریر و پاکستان و ترکی ءِ مون تروک باہوٹ آتا بھلو کچ اسے ٹی بننگ نا معاملہ غاہم خیال آتا درشانی مس۔ ترکی نا سفیر انسانی حق انا مون آ دننگ و رکھ اکن حکومت پاکستان خاص کر وزارت انسانی حق انا کنڈآن کروک آ گام گیج آتون اوار ملک اٹی انسانی حق انا ساڑی آ حالیت آتا ستاءِ کرے۔ داوخت آ خیال آتا درشانی ءِ کرسا بنجائی وزیر انسانی حق ڈاکٹر شیریں مزاری پارے کہ انسانی حق انا مون آ دننگ و رکھ اکن گام گیج آتیا عملدرآمد ءِ المی جوڑ کننگ انگ ءِ۔ اوپارے کہ آئین پاکستان ہم انسانی حق انا فراوانی نا ضمانت ءِ ایتک و نن داڑآ عملدرآمد ءِ المی جوڑ کینہ انتئے کہ دا ننا قومی زمواری ءِ۔
