اسلام آباد۔ 06 ستمبر (اے پی پی) بنجائی وزیر اطلاعات و نشریات چوہدری فواد حسین پارینے کہ حکومت لمہ وطن نا دفاع کن سلہہ بند فوج ءِ غٹ المی وسیلہ غاتے فراوان کیک۔ اوداخیال آتا درشانی ءِ پنچ شنبے نادے نیشنل براڈ کاسٹنگ ہاؤس اٹی یوم دفاع شہید آتا بابت ریڈیو پاکستان نا نیوز اینڈ کرنٹ افیئر چینل نا خصوصی نشریات اٹی ہیت وگپ کرسا کرے۔ اوپارے کہ وزیراعظم عمران خان نا جی ایچ کیو نا ساڑی آ دورہ ٹی ملکی دفاع تون اوار چندی معاملہ غاتیا سرجم اتون خیال آتا درشانی ءِ کننگا۔ اوپارے کہ سلہہ بند فوج قوم انا فخر ءِ و قوم اوفتا قربانی تیا اوفتے سلام پیش کیک۔ اوپارے کہ ملک اٹی امن سلہہ بند فوج انا قربانی تیان ءِ۔ اسہ سوج اسے نا ورندی ٹی چوہدری فواد حسین پارے کہ پاکستان ڈیہہ ٹی امن خواہک و علاقائی شونہالی کن بھارت تون تعلقداری تے گچین جوڑ کننگ نا خواہندار ءِ۔ اودا ہیت آ است ہسونی نا درشانی ءِ کرے کہ بھارت اٹی بی جے پی نا حکومت پاکستان تون تعلقداری تے گچین جوڑ کننگ نا گام گیج آتا جاگہ غا ہندو توا نا ایجنڈا غا عمل کننگ ءِ۔ فرض انا بجاآوری ٹی جان تے ندرکروک آ شہید آتے خراج عقیدت پیش کرسا چوہدری فواد حسین پارے کہ یوم دفاع و یوم شہداء نا قربانی تا یات ءِ اڈتننگ و پدسلوک آ خاہوت آتون ہمدردی نا درشانی ءِ کننگ نا دے ءِ۔
