اسلام آباد۔ 06ستمبر (اے پی پی) جہانی اقتصادی فورم حکومت پاکستان نا کنڈآن ’’پلانٹ فار پاکستان ‘‘ پروگرام نا رداٹ اسہ دے اٹی 15لکھ نیال خلنگ نا مہم نا سرسہبی ءِ امنا کرینے۔ حکومت پاکستان بروک آ پنچ سال اٹی مچ آ ملک اٹی بھلو شجر کاری اسے کن 10 ارب نیال خلنگ نا کوشست آتا چرجوئی ٹی 2ستمبر آ’’پلانٹ فار پاکستان‘‘ نا سرحال آن اسہ دے اٹی 15لکھ نیال خلنگ نا ہدف ءِ باآسانی دوئی کرینے۔ پاکستان داوخت آ جنگل آتا کمتی نا گواچی ءِ و موسمیاتی بدلی نا سوب پیش بروک آ واقعہ غاتیان شدید زہمی ملک آتے ٹی اوار ءِ۔ ساڑی آ حکومت دا عوامل آتا رداٹ ملک ءِ سرسوز و شاداب جوڑ کننگ کن بھلو کچ اسے آ شجر کاری مہم نا بناءِ کننگ نا پڑو ءِ کرے و تینا بنائی دے تیٹی ہی بیرہ اسہ دے اٹی 15لکھ نیال خلسا داپبی مہم نا سرسہب بناءِ کرینے۔ حکومت نا دا کوشست آتا ستاءِ کننگ انگ ءِ و جہانی اقتصادی فورم ہم بنائی مہم نا سرسہبی اٹ امناءِ کرینے۔
