اسلام آباد۔ 05ستمبر (اے پی پی) بنجائی کابینہ پیشن نا ملک آتیان پاکستانی پیسہ غاتے پدی اتنگ کن وزیراعظم ہاؤس اٹی خصوصی یونٹ اس جوڑ کننگ، بنجائی وزیر شفقت محمود نا کماشی ٹی تعلیمی ٹاسک فورس نا اڈتننگ، تربیلا ڈیم ودکی ڈٹ اٹی 25ارب روپئی نا نسخان ناجاست وپاست،بنداوی تعلیم کن اسہ وڑ نصاب درستی راستی کرفنگ، چناتے تون بیدادی و چائلڈ لیبر نا توننگ کن گام گیج، پنڈوک آ چناو زالبول آتے کن خصوصی سینٹر اس جوڑ کننگ نا منظوری تس وخت اس کہ وزیراعظم صوابدیدی فنڈ انا چٹفنگ آن پد 80 ارب روپئی نا پیسہ غاک پارلیمان آ کارہ ۔ تعلیمی ادارہ غاتے ٹی جسمانی سزا آ پورو پابندی نا پرمان جاری کننگانے ، غٹ سفارت خانہ غاتے پردیسی تا خذمت و پیشن نا ملک آتا جیل آتے ٹی بند پاکستانی تا کانودی کمکار ی نا فیصلہ ءِ کننگانے دا چرجوئی ٹی پارت جاری کننگانے۔ چارشنبے نادے وزیراعظم عمران خان نا کماشی ٹی بنجائی کابینہ نا دیوان اڈ ہلک۔ دیوان آن پد بنجائی وزیر اطلاعات و نشریات چوہدری فواد حسین وزیراعظم ناسلاہکار احتساب بیرسٹر شہزاد اکبر تون اوار میڈیا ءِ بریفنگ تس۔ بنجائی وزیر اطلاعات و نشریات فواد چوہدری کابینہ نا فیصلہ غاتا بارواٹ پارے کہ بنجائی کابینہ نا دیوان اٹی پاننگاکہ وزیراعظم نا صوابدیدی فنڈز واپس کننگانے ہراڑآن 80 ارب روپئی نا بچت مسنے، داپیسہ غاک پارلیمانی نا کنڈآ کارہ۔ 80 ارب روپئی نا بچت وزیراعظم عمران خان نا صوابدیدی فنڈ ءِ کاریم اٹ اتپننگ نا پڑو آن مسنے۔ اوپارے کہ مسکوہی حکومت نا کنڈآن تربیلا ڈیم انا بے پورو ڈٹ انا بناءِ فیتہ کاٹ کننگ کن کننگا، داڑآن 25 ارب روپئی نسخان نا خبر آ وزیراعظم عمران نوٹس ہلکونے و وزیراعظم انسپکشن سیل ءِ پارت تسنے کہ او دامعاملہ نا انکوائری ءِ کرسا رپورٹ ءِ پیش کے۔
