اسلام آباد۔ 05 ستمبر(اے پی پی) سینیٹ نا قائمہ کمیٹی اطلاعات و نشریات نا چیئرمین فیصل جاوید پارینے کہ وزیراعظم عمران خان کفایت شعاری و سادگی مہم نا باقاعدہ بناءِ تینا جند آن کرینے، او 1100 کینال نا وزیراعظم ہاؤس ءِ ہلسا 4کینال آن ہم کم رقبہ نا اُراٹی منتقل مسنے، وزیراعظم ہاؤس اٹی ایچ ای سی سینٹر آف ایکسیلینس یونیورسٹی اس جوڑ کننگ کن ہوم ورک جاری ءِ، ارٹ میکو مرحلہ ٹی گورنر ہاؤس ، وزیراعلیٰ ہاؤس و ایلو بھلا بھلا سرکاری ہاؤس آتا سرجم آتے الس نا مون آتخک، پلوک آ پیسہ غاتے پدی اتنگ کن ٹاسک فورس کاریم کننگ ءِ، بھلابھلا ماڑی تیٹی رہینگسا حکمران تا عیاشی ءِ مدام اکن چٹفسا کفایت شعاری و سادگی کن کانود سازی نا کمک اٹ لانگ ٹرم پالیسی نافذ کینہ، واکدار ، نزور، ہزگار و نیزگار اکن اسہ ہی کانود و پالیسی اس مریک، دا وزیراعظم عمران خان نا الس کن کلہو ءِ کہ او تینٹ و اونا ٹیم الس نا خراج نا پیسہ غاتا خیالداری ءِ کیرہ، داسہ الس نا پیسہ الس آ خڑچ مریک۔ اوداہیت ءِ وزیراعظم نا خصوصی کمکار میڈیا افتخار درانی تون اوار پی آئی ڈی ٹی پریس کانفرنس اٹی پارے۔ سینیٹر فیصل جاوید پارے کہ ہراملک اٹی 8 کروڑ خلقت ءِ صاف ٹوائلٹ نا آسراتی مف، 21 درسد خلقت چاگڑدگی آلودگی نا سوب مرک انا باٹی کار، 23ملین چنا اسکول آتیان پیشن مریر، 5سال انا چناخراب انگا دیر تا سوب کہیر، 45 درسد چناتا غذائی کاختی نا سوب ذہنی نشوونمامف، ہراڑے نیاڑیک زچگی ٹی مرک انا باٹی کار و ہرا ملک انسانی وسیلہ غاتا درجہ بندی ٹی 188 ملک آتیان 147می نمبر آ مرے، داملک انا حکمرانک امر بھلا بھلا ماڑی تیٹی تینا شاہانہ زند اکن الس نا خراج نا پیسہ غاتے بے دردی اٹ کاریم اٹ اتنگ کیرہ۔
