اقوام متحدہ نا فوجی مبصر گروپ ءِ سلامتی کونسل نا قرارداد آتا رداٹ تینا کڑد ءِ ادا کننگ نا موکل تننگے
اسلام آباد۔ 05ستمبر (اے پی پی) پاکستان بھارتی ڈپٹی ہائی کمشنر ءِ دفترخارجہ غا بٹنگسا کنٹرول لین آ سیز فائر نا بلااشتعال خلاف ورزی تا مذمت ءِ کرینے۔ ترجمان دفترخارجہ نا کنڈآن چارشنبے نادے آجاری بیان نارداٹ ڈائریکٹر جنرل (سویلی ایشیاو سارک) ڈاکٹر محمد فیصل بھارتی ڈپٹی ہائی کمشنر ءِ بٹنگا و کنٹرول لین نا کوٹ کوٹیڑ اسیکٹر اٹی بھارتی کوزہ گر فوج انا کنڈآن 4ستمبر 2018 ء آ سیز فائر نا بلااشتعال خلاف ورزی تا مذمت ءِ کرے ہراٹی اسہ بے گناہ شاریس عبدالرؤف شہید مس ہرامالءِ خوافیکہ۔ ترجمان نار داٹ بھارتی فوج کنٹرول لین و ورکنگ باؤنڈری تون 2ہزار آن زیات خلاف ورزی کرینے ہرافتے ٹی 32بے گناہ شاری شہید وخت اس کہ 122 پین ٹھپی مسنو۔ بھارت نا کنڈآن سیز فائر نا بھلا خلاف ورزی تا چرجوئی سال 2017 ء آن جاری ءِ و داوخت اٹی بھارتی فوج کنٹرول لین آ سیز فائر نا 1970 خلاف ورزی کرے۔ بیان اٹی پاننگاکہ آبادی ءِ دانستہ نشانہ جوڑ کننگ است ہسونی و انسانی شرف و جہانی انسانی حق و کانود نا منافی ءِ۔ بھارت نا کنڈآن دُن انگا خلاف ورزیک علاقائی امن و سلامتی کن خلیس ءُ و تزویراتی غلط اندازہ نا سوب جوڑ مننگ کیرہ۔ ڈائریکٹر جنرل محمد فیصل بھارت آ زور شاغا کہ او 2003 ء نا سیز فائر انتظام نا پاسداری ءِ کے۔ کنٹرول لین آ سیز فائر نا خلاف ورزی نا ساڑی و ایلو واقعہ غاتا جاست وپاست ءِ کرفنگے و بھارتی فوج ءِ سیز فائر آ حقی وڑاٹ عملدرآمد و کنٹرول لین آ امن ءِ برقرار تخنگ نا پارت کننگے۔ اوزورشاغاکہ بھارت نا کنڈآن اقوام متحدہ فوجی مبصر گروپ پاک بھارت ءِ اقوام متحدہ نا سلامتی کونسل نا قرارداد آتارداٹ تینا کڑد ءِ ادا کننگ نا موکل تننگے۔
