اسلام آباد۔ 4 ستمبر (اے پی پی) مزن وزیر عمران خان ءَ گوں جاپان پاکستان فرینڈ شپ لیگ ءِ ڈل ءَ چیئرمین سیشیرو ایٹو ءِ سروکی ءَ گند ءُُ نند کت۔ آ گوستگیں روچ ءَ پارلیمانی ڈل ءِ ھمبراھی ءَ سئے روچی تر ءُُ تاب ءَ پاکستان ءَ سر بوتگ۔ آئی ءَ مزن وزیر ءَ را ملک ءَ جمہوری کار ءِ رچ ءُُ وزارت ءِ زمہ واری آنی سمبھالگ ءِ پد ءَ مبارک بات دات۔ آئی ءَ گوشت کہ جاپان پاکستان ءِ گوما وت مہ وتی یکوئی ءِ سر ءَ برجائیں دو نیمگی سیادی ءَ را گیش مھکم کنگ ءِ واھشت مند اِنت۔ یک ھپتگتے ءِ کسانیں وھد ءُُ پاس ءَ دو مزن تک ءِ ڈل ءِ تر ءُُ تاب جاپانی حکومت ءِ پاکستان ءَ نوکیں حکومت ءِ گوما دو نیمگی سیادی ءَ را ودینگ ءِ آدینک ءَ پیش دار ایت۔ مزن وزیر ءَ ڈل ءَ را وش اتک کت۔ اے موہ ءِ سر ءَ پارلیمانی ڈل آنی روگ ءُُ آیگ ءُُ دو نیمگی سیادی ءِ گہتری ءَ پارلیمنٹ ءِ باسک آنی کرد ءِ ارزشت ءِ سر ءَ تپاک کنگ بوت۔ مزن وزیر ءَ پاکستان ءُُ جاپان ءِ نیام ءَ سیادی ءِ پڑ ءَ جوانیں گامگیج آناں ساڑات ءُُ جاپان ءِ شریک بوھگ ءِ ارزشت ءِ درشان کت۔ آئی ءَ دوئیں ملک آنی نیام ءَ ھاسیں رنگ ءَ تجارت، سرمایہ کاری، انفراسٹرکچر ءُُ بنی آدمی جیڈھ آنی گیواری ءِ شوبگ آنی تہ ءَ پراھ ءُُ شاھیگانیں واھشت ءِ درشان کت۔ گند ءُُ نند ءَ دوئیں نیمگ ءَ اے گپ ءِ سر ءَ تپاک کنگ بوت کہ پارلیمانی ڈل ءِ روگ ءُُ آیگ ءَ چہ سیادی گیش مھکم بنت۔ آئی ءَ دوئیں ملک آنی نیام ءَ راجدپتری یکوئی ءُُ جتا جتائیں شوبگ آنی تہ ءَ وت مہ وتی کمک ءَ را ساڑات۔
