بیجنگ۔ 03 ستمبر (اے پی پی) چین وپاکستان نا نیام اٹ آپٹیکل کیبل آ تالان سی پیک ڈیجیٹل انفارمیشن چینل ءِ کاریمی جوڑ کننگا۔ چین نا شار ارومچی ٹی شش می چائنا یورو ایشیا ء ایکسپو ٹی چائنا ٹیلی کام گروپ نا ایگزیکٹو وائس پریذیڈنٹ تان یی جون پارے کہ اینخو سال 13جولائی آ ارومچی آن راولپنڈی اسکان 2,950 کلومیٹر مریس چائنا پاکستان آپٹیکل کیبل پورو مربوط کننگ آن پد اونا آزمائش ءِ ہم کننگانے۔ دابھلا ڈیجیٹل چینل نا بھلا بشخ باضابطہ وڑاٹ پورو مسنے و دانا کمرشل ءِ کاریم اٹ اتنگ نا ہم بناءِ کننگانے ہراڑآن چین و پاکستان و جہانی کمیونیکیشن نا نیام اٹ فاصلہ چنک مسنے ۔ مستین اٹی بیجنگ و اسلام آباد نا نیام اٹ مواصلاتی رابطہ سب میرین (سمندر اٹی ) کیبل نا کمک اٹ ئس ہراڑآن بیرہ 180 ملی سیکنڈ نا تعطل بسکہ ہرا چائنا پاکستان آپٹیکل کیبل اٹ 81.8 ملی سیکنڈ اسکان نا تعطل آ بسنے ہراکہ ملٹی نیشنل فنانشل ٹرانزیکشن و ٹیلی میڈیسن تون اوار صنعت آتے کن لاجواب مسنے ۔ چائنا ٹیلی کام گروپ نا ڈپٹی جنرل منیجر زانگ شی یانگ داوخت آ پارینے کہ چائنا ٹیلی کام چین پاکستان آپٹیکل کیبل نا بناءِ اسہ بھلو وارخواہی سے نا وڑاٹ ہلیک۔ داڑآن تین پہ تینی و جہانی مواصلاتی کمکاری و انفارمیشن کوریڈور نا پاکستانی شریدار آتون اسیجائی وڑاٹ بنجائی ڈٹ آتا جوڑ جاڑ ءِ ودفنگ و مون آ دننگ دوئی مریک۔ داوخت آ چائنا ٹیلی کام نا جنرل منیجر پاکستان اسپیشل کمیونیکشن آرگنائزیشن علی فرحان چائنا پاکستان کیبل ءِ مواصلاتی تاریخ نا نہر سوئز گوندا۔
