اسلام آباد۔ 03 ستمبر (اے پی پی) وزیر خارجہ شاہ محمود قریشی پائیدار علاقائی امن نا دوئی کن اواری اٹ کاریم کننگ نا گرج ءِ تالان کرسا دا ہیت انا اعادہ ءِ کرینے کہ خڑکی ہمسایہ غاتا حیثیت اٹ پاکستان و اوغانستان نا امن و شونہالی اسہ ایلو تون گنڈوک ءِ۔ اوداہیت ءِ اوغانستان نا وزیر خارجہ صلاح الدین ربانی تون ہیت وگپ کرسا پارے ہرا دوشنبے نادے پاکستانی ہم منصب ءِ ٹیلی فون کرے و وزارت خارجہ نا منصب ءِ سنبھالنگ آ مبارکبادی تس۔ پاکستان کن اوغان حکومت و الس نا نیک است خواہی تا درشانی ءِ کرسا صلاح الدین ربانی پارے کہ او پاک اوغان ہڑتوم آ کنڈآتا تعلقداری ٹی سوگوی نا خواہندار ءِ۔ ترجمان دفترخارجہ نا کنڈآن جاری بیان نا رداٹ ہڑتوم آ راہشونک مئی 2018 ء ٹی پاکستان اوغانستان لائحہ عمل امن و یکجہتی (اے پی اے پی پی ایس) نا عمل نا بناء آن تعلقداری تیٹی ساڑی آ گچینی تا ستاءِ کرے ۔ داہیت ءِ نوٹ کننگاکہ دافریم ورک غٹ تین پہ تینی معاملہ غاتیا سجفنگ کن جامع ترین ادارہ جاتی نظام اس فراوان کرینے۔ ہڑتوم آ راہشونک داہیت آ امنا کریر کہ اے پی اے پی پی ایس نا بروک آ دور زوت اس اسلام آباد اٹی اڈ ہلیک۔ اواسلام آباد اٹی اسیجائی پاک اوغان علماء کانفرنس نا اڈتننگ نا ہم ستاءِ کرے ہرانا تاریخ تے گڈیکو دروشم تننگ انگ ءِ۔ سیکورٹی تنکی نا سوب جلال آباد اٹی پاکستانی قونصلیٹ جنرل نا بند مننگ نا معاملہ غا ہم ہیت وگپ مس۔ شاہ محمود قریشی اوغان حکومت آن 28 اگست 2018 ء اسکان ساڑی تدوک آ سیکورٹی بست و بند آتا بحالی نا درخواست کرے تانکہ قونصلیٹ جنرل تینا مست انا رداٹ دُوارہ معاملہ کار ءِ انجام تننگ کے۔ اوغان وزیر خارجہ دارداٹ مثبت ورندی نا یخین دہانی کرفے و تدوک آ دے کابل اٹی پاکستانی سفیر تون تینا اوڑدہی نا ذکر ءِ کرے۔ اوغان وزیر خارجہ شاہ محمود قریشی ءِ اوغانستان نا دورہ نا سلہ خلک ہرادے او امنا کرے۔
