اسلام آباد۔ 31 اگست (اے پی پی) وزیراعظم عمران خان ءَ اے پڑ ءَ سرجمیں ایمن ءُُ برجائی ءِ واستہ زور دیان ءَ گوشت کہ پاکستان ءُُ ایران دراج بُریں یکوئی ءُُ السی تک ءِ رابطہ آنی وسیلگ ءَ پڑ ءَ دیمروئی ءُُ وشھالی ءِ واستہ کلیتی بستار ءَ کرز ایت، پاکستان دوئیں ملک آنی نپ ءُُ سیت ءِ جتا جتائیں شوبگ آنی تہ ءَ دو نیمگی یکوئی ءَ را مھکم جوڑ کنگ ءِ واستہ ھمک رنگ ءِ کوشست آناں کارمرد کن اَنت، مسلمانیں ملک آناں اسلام فوبیا ءِ گوانک ءَ را دارگ ءِ ضلورت اِنت۔ آئی ءَ اے گپ ایرانی وزیر ءِ درئی کار جواد ظریف ءَ گوں تران کنان ءَ کت آئی ءَ آدینگ ءِ روچ ءَ ادا گند ءُُ نند کت۔ ایرانی وزیرت ءِ درئی کار ایران ءِ سروکی ءُُ الس ءِ نیمگ ءَ مزن وزیر ءَ را سیٹ ءِ سر ءَ نندگ ءِ مبارکی دیان ءَ گوشت کہ ایران پاکستان ءَ یک شل ءَ دیمروئی ءُُ وشھالی ءِ واھشت مند اِنت۔ جواد ظریف ءَ مزن وزیر ءَ را اکتوبر 2018ءَ ایران ءَ ایشیائی کمکی ’’مکالمہ‘‘ (اے سی ڈی) ءِ واستہ دعوت داتگیں ایرانی صدر حسن روحانی ءِ کلوہ ءَ را پُجارینت۔ پاکستان ءُُ ایران گل ءِ باسک اَنت وھدیکہ ایران ءَ انوں زوت گل ءِ صدارت وتی کوپگاں زرتگ۔ مزن وزیر عمران خان ءَ وزیر ءِ درئی کار ءَ وش اتک کنان ءَ کشمیری آنی جائزیں وت واجہی ھک ءِ واستہ کمک ءُُ ھما رنگ ءَ ایران ءُُ پاکستا ن ءَ آزاتی ءِ درگت ءَ برجم داشتگیں روچ ءَ شاتکامی کت ایشی ءِ سر ءَ ایرانی سپریم لیڈر ءِ شگر ءُُ منت گپت۔ مزن وزیر ءَ نیکیں واھگ آنی پد ءَ ایرانی وزیر ءِ درئی کار ءِ شگر ءُُ منت گران ءَ صدر حسن روحانی ءِ گوما وتی زوتیگیں ٹیلی فون ءِ بابت ءَ تران کت۔
