اسلام آباد۔ 31 اگست (اے پی پی) صدر مملکت ممنون حسین پارینے کہ پرتگال و آئر لینڈ یورپ نا بے کچ اہم ءُ ملک ءُ و پاکستان اوفتے تون زند انا چندی بشخ آتے ٹی کمکاری ٹی ودکی نا است خواہی تخک پاکستان نا پندار سفیر داچرجوئی ٹی تندہی اٹ کاریم کیر۔ داہیت ءِ صدر مملکت جمعہ نادے داڑے پرتگال و آئر لینڈ کن پاکستان نا پندار سفیر شاہ محمد جمال و شجاع عالم تون ہیت وگپ کرسا پارے۔ داوخت آ ایلو بڑزکو کمامدارآک ہم ساڑی ئسر۔ صدر مملکت پارے کہ پاکستان نا آئر لینڈ و پرتگال تون واپار لائخی و گنجائش آن بھاز کم ءِ ہراٹی ودکی کن پدریسہ کاریم کننگ نا گرج ءِ۔ اوپارے کہ داملک آتون سیاسی و واپاری تعلقداری تیان بیدس دودوربیدگی و تعلیمی بشخ آتے ٹی ہم ودکی نا گرج ءِ۔ صدر مملکت پندار سفیر آتے پارت کرے کہ او دا ملک آتے ٹی رہینگوک آ پاکستانی تتون خڑکی رابطہ تخنگے و اوفتا ویل آتا ایسری کن تندہی اٹ کاریم کننگے۔ صدر مملکت پارے کہ ہڑتوم آ ملک آتا نیام اٹ چندی بشخ آتے ٹی ڈل آتا ہن و بر نا گرج ءِ تانکہ اسہ ایلو نا لائخی و آزموندہ غاتیان فائدہ ہرفنگ کیر۔ صدر مملکت پندار سفیر آتے پارت کرے کہ او پرتگال و آئر لینڈ نا زرکارآتے پاکستان اٹی زرکاری نا کنڈآ اتیر۔
