اسلام آباد۔ 31 اگست (اے پی پی) وزیر خارجہ شاہ محمود قریشی پارینے کہ ایران و پاکستان مشکل وخت اٹی اسہ ایلو تون مون پہ مون سلرہ ۔ پاکستان ایران نا سپریم لیڈر آیت اللہ خامنہ ای نا کنڈآن کشمیری الس نا منصفانہ جہد نا غیر متزلزل مخ تفی ءِ قدر انا نظر اٹ ہرک۔ کمکاری نا غٹ بشخ آتے ٹی ہڑتوم آ کنڈآتا تعلقداری ءِ پین مون آ دننگ نا گرج ءِ۔ داہیت آتے او تینا ایرانی ہم منصب جواد ظریف تون ہیت وگپ کرسا پارے ہرا جمعہ نادے داڑے اوڑتون اوڑدہی کرے۔ دفترخارجہ نا ترجمان نا رداٹ وزیر خارجہ شاہ محمود قریشی و اونا ایرانی ہم منصب جواد ظریف نا نیام اٹ جمعہ نادے دفترخارجہ ٹی سرجم ہیت وگپ مس۔ جواد ظریف وزیراعظم عمران خان نا سرکڑدہ ہی ٹی لس گچین کاری تیٹی سرسہبی آ ایرانی سرکڑدہ و الس نا کنڈآن نیک است خواہی نا کلہو ءِ سرکرے و شاہ محمود قریشی ءِ وزارت خارجہ نا منصب ءِ سنبھالنگ آ مبارکبادی ہم تس۔ ایرانی ہم منصب نا خیرمقدم ءِ کرسا شاہ محمود قریشی پارے کہ ہڑتوم آ ملک آتا نیام اٹ مست آن سوگو ہڑتوم آ کنڈآتا تعلقداری ءِ پین سوگو جوڑ کینہ۔
