اسلام آباد۔ 30 اگست (اے پی پی) دفترخارجہ نا ترجمان ڈاکٹر محمد فیصل پارینے کہ پاکستان و بھارت نا نیام اٹ تعلقداری تیٹی خلیج ءِ کم کننگ کن کوشست آک برجاءُ ، پاک بھارت تعلقداری تیٹی مثبت پیش رفت آن ایل او سی ورکنگ باؤنڈری آ امن اٹی کمک رسینگک۔ وزیراعظم عمران خان و امریکی وزیر خارجہ نا نیام اٹ ٹیلی فون آ ہیت وگپ نا بابت تنازعہ ءِ چٹفنگ خوانہ، ننے سیاسی وڑاٹ مون آ ہِننگ نا گرج ءِ ، امریکی وزیر خارجہ بروک آ چارشنبے آ پاکستان نا سرکاری دورہ غا بریک، گستاخانہ خاکہ غاتا معاملہ ءِ ہالینڈ نا حکومت تون چست کرین و اودے حکومت پاکستان و پاکستانی الس نا گڑتی تیان معلومدار کننگانے۔ معاملہ او آئی سی و ایلو جہانی فورم تیا ہم چست کننگانے ، وزیر خارجہ شاہ محمود قریشی دا معاملہ ءِ اقوام متحدہ نا جنرل اسمبلی نا بروک آ سیشن اٹی ہم چست کیک، خارجہ پالیسی ٹی بدلی کننگک، خاص کر پردیسی تیا خصوصی چکار کننگک۔ پنچ شنبے نادے ہفتہ وار پریس بریفنگ اٹی صحافی تا جتا سوج آتا ورندی ءِ ترسا ترجمان دفترخارجہ پارے کہ پاکستان و بھارت نا نیام اٹ تعلقداری تیٹی بھلو خلیج اسے، معاملہ غاتا ایسری آسان اف، ولے داخلیج ءِ کم کننگ نا غرض اٹ ہڑتوم آ کنڈآتا واپار نا بحالی و کرتارپورہ سیم ءِ ملنگ کن کوشست آک برجاءُ۔
