اسلام آباد۔ 30 اگست (اے پی پی) اسپیکر قومی اسمبلی اسد قیصر تون پاکستان اٹی جاپان نا سفیر تکاشی کورائے پنچ شنبے نادے پارلیمنٹ ہاؤس اٹی اوڑدہی کرے ہراٹی ہڑتوم آ کنڈآتا تعلقداری تون اوار تین پہ تینی است خواہی نا معاملہ غاتیا خیال آتا درشانی ءِ کننگا۔ داوخت آ اسپیکر پارے کہ پاکستان جاپان تون تینا رابطہ غاتے بھاز قدر انا نظر اٹ ہرک ۔ جاپان صنعتی و معاشی شونداری نا اعتبار اٹ ڈیہہ ٹی اسہ جتا ءُ ہند اس تخک۔ اوپارے کہ پاکستان جاپان تون غٹ بشخ آتے ٹی زرکاری ءِ مون آ دننگ نا خواہندار ءِ۔ ساڑی آ حکومت غٹ ملک آتون پاکستان اٹی غٹ ملک آتا زرکاری ءِ اولیتی بنداو تیا مون آ دننگ خواہک۔ ہڑتوم آ ملک آک ہر مشکل وخت اٹی اسہ ایلو تون سلوک مسنو۔ اسد قیصر پارے کہ پاکستان و جاپان نئے بیرہ اسہ براعظم اسے ٹی واقع ءُ بلکن اوفتا انسانی اقدار نا اسیجا روایت آک ءُ۔ اوپارے کہ پاک چین اقتصادی راہداری نا ڈٹ آن ڈیہہ نا غٹ ملک آتے واپار نا اسہ وڑ وارخواہی ملک۔ جاپان نا سفیر اسد قیصر ءِ اسپیکر گچین مننگ آ مبارکبادی تس وپارے کہ جاپان پاکستان تون تعلقداری مستحکم و سوگو جوڑ کننگ خواہک۔ پاکستان تون توانائی تون اوار غٹ بشخ آتے ٹی کمکاری ءِ مون آ دینہ۔ اوپارے کہ ننے ڈیہہ نا شونداری و شونہالی کن پارلیمانی سفارتکاری نا کمک اٹ اسہ ایلو نا خڑک بروئی مریک۔ جاپانی سفیر پارے کہ نن پاکستان اٹی معاشی شونداری نا مون آ دننگ کن کمکاری ءِ برجاتخنہ۔ اواسپیکر اسد قیصر نا ہڑتوم آ ملک آتا نیام اٹ اقتصادی و واپاری تعلقداری تے مون آ دننگ نا سلاہ غاہم امنا کرے۔ اوپارے کہ جاپان پاکستان اٹی تعلیم ، توانائی و انفارمیشن ٹیکنالوجی نا گچینی کن کمکاری ٹی ودکی کیک۔
