نیویارک۔ 30 اگست (اے پی پی) پاکستان کشمیرنا جھیڑہ نا ایسر نا چاری ویل انا حوالہ ءِ ترسا اقوام متحدہ نا سلامتی کونسل آ زور شاغانے کہ سلامتی کونسل نا ہمو قرارداد آتیا عملدرآمد کرفنگے ہرافتے ٹی کشمیری الس ءِ حق خودارادیت نا کاریم اٹ اتنگ نا حق تننگانے تانکہ سویلی ایشیا ٹی امن ءِ قائم کننگ مرے۔ اقوام متحدہ ٹی پاکستان نا آخبتی مندوب ملیحہ لودھی ’’ثالثی و جھیڑہ غاتا ایسری‘‘ نا بارواٹ سلامتی کونسل اٹی اڈ ہلوک آ شرہ ٹی بشخ ہلسا پارے کہ اگہ سلامتی کونسل نا تینا منظور کروک قرارداد آک پد سلر تو جہانی برادری جھیڑہ غاتا توننگ و جھیڑہ غاتا پرامن ایسری ءِ المی جوڑ کننگ نا کوشست آتے ٹی سرسہب مننگ کپک۔ اوپارے کہ دُن تو اقوام متحدہ گڑاس سیاسی جھیڑہ غاتا ایسری ٹی سرسہب ہم مسنے ولے جموں و کشمیر نا جھیڑہ نا ایسری بھلو وخت اسے آن سلامتی کونسل نا ایجنڈا غاٹی ءِ وخت اس کہ 15 باسکی سلامتی کونسل تینٹ گوندانے کہ دا ویل ءِ حتمی وڑاٹ کشمیری الس نا مرضی نا رداٹ ہی ایسر کننگ مریک و دا اقوام متحدہ نا چاروکی ٹی جمہوری ، آزادانہ و غیر جانبدارانہ وڑاٹ اڈ ہلوک آ استصواب رائے نا کمک اٹ کننگک۔
