کوئٹہ۔ 29 اگست (اے پی پی) پاکستان تحریک انصاف نا صدارتی اومیت دار عارف علوی پارینے کہ بلوچستان نا الس نا احساس محرومی نا چٹفنگ آن بیدس پوسکن آ پاکستان نا جوڑ کننگ ممکن اف۔ صدارتی گچین کاری کن کنا پنداری آ وزیراعظم عمران خان نا منت وار اُٹ۔ صدارتی گچین کاری ٹی گیشتری اٹ کٹیوہ۔ اونا باوجود غٹ سیاسی جماعت آتا اسمبلی نا باسک آتون اوڑدہی کرسا وونٹ اکن اوفتے پاوہ۔ داخیال آتا درشانی ءِ او چارشنبے نادے اسلام آباد آن کوئٹہ غا بننگ نا وخت آ میڈیا تون ہیت وگپ کرسا کرے۔ داوخت آ بنجائی وزیر دفاع پرویز خٹک، جہانگیر ترین، ڈپٹی اسپیکر قومی اسمبلی قاسم خان سوری و بلوچستان تحریک انصاف نا صوبائی سرکڑدہ ہم ساڑی ئس۔ صدارتی اومیت دار عارف علوی پارے کہ وزیراعظم عمران خان بلوچستان نا محرومی تا چٹفنگ نا ضمانت ءِ تسونے۔ اوپارے کہ بلوچستان نیشنل پارٹی مینگل نا سروک سردار اختر جان مینگل کوئٹہ ٹی ساڑی اف اونا پارٹی نا ایلو راہشون آتون سلابت کیوہ۔ اسہ سوج اسے نا ورندی ٹی صدارتی اومیت دار عارف علوی پارے کہ مسنگ پرسن ویل انا ایسری کن وزیراعظم عمران خان بلوچستان نا اسمبلی نا باسک آتون ہرا وعدہ ءِ کرینے اودے پورو کیک۔ داوخت آ بنجائی وزیر دفاع پرویز خٹک پارے کہ جمہوری روایت آتا گرج ءِ کہ ننے سیوتی تیان وونٹ خواہنگ کن اوفتا پلو آبایدے کان۔ پشتون، بلوچ و سندھی روایت آتا رداٹ وونٹ خواہنگ کن اسمبلی نا باسک آتا کنڈآ ہنوئی تمک۔ میڈیا تون ہیت وگپ کرسا پی ٹی آئی نا بنجائی راہشون جہانگیر ترین پارے کہ صدارتی گچین کاری ٹی اسہ اسہ وونٹ انا ہلنگ کن رابطہ کینہ۔ وزیراعظم عمران خان نا وژن صفا ءِ و داغٹ ویل آتا ایسری پوسکن آ پاکستان اٹی سادگی نا فارمولا ءِ وزیراعظم طے کرینے۔ داکان مست ہراتم صدارتی اومیت دار عارف علوی جہانگیر ترین و قاسم سوری کوئٹہ غا سرمسر تو تحریک انصاف نا صوبائی صدر سردار یار محمد رند کوئٹہ بالی پٹ آ اوفتے بخیر کرے۔
