اسلام آباد۔ 29 اگست (اے پی پی) بنجائی وزیر اطلاعات و نشریات فواد چوہدری پارینے کہ پاکستان الیکٹرانک میڈیا ریگولیٹری اتھارٹی (پیمرا) و پاکستان پریس کونسل ءِ چٹفسا زوت اسے اٹ پوسکن ءُ پاکستان میڈیا ریگولیٹری اتھارٹی اس ٹہیفنگک ہرا الیکٹرانک ، پرنٹ و سوشل میڈیا ءِ ریگولیٹ کیک، مسکوہی حکومت اشتہار آتا زی آ چلینگاکہ وخت اس کہ نن جندی تشہیر کن سرکاری خڑچ آتیا پورو پابندی خلکونن۔ چارشنبے نادے پارلیمنٹ ہاؤس نا پیشن میڈیا تون ہیت وگپ کرسا بنجائی وزیر اطلاعات پارے کہ داوخت پیمرا الیکٹرانک میڈیا و پاکستان پریس کونسل پرنٹ میڈیا نا معاملہ غاتے ہُننگ ءِ، نن فیصلہ کرینن کہ پیمرا و پاکستان پریس کونسل نا کانود اٹی ترمیم کرسا اسہ ہی ادارہ اس پاکستان میڈیا ریگولیٹری اتھارٹی جوڑ کننگے ہراٹی تینا تینا شعبہ نا چاہندار آک اوار مریرہ۔ دارداٹ ذرائع ابلاغ نا نمائندہ و تعلقدار چاہندار آتون سلابت کننگک و پاکستان میڈیا ریگولیٹری اتھارٹی اس ٹہیفنگک ہرا الیکٹرانک ، پرنٹ و سوشل میڈیا ءِ ریگولیٹ کیک۔ داڑآن قومی وسیلہ نا بچت مریک و دا کسبی چاہندار و میڈیا نا نمائندہ غاتیا تالان جہانی درجہ نا ادارہ اس مریک۔ اوپارے کہ وزارت اطلاعات نا ادارہ غاتے ٹی ہم نمان بدلی اتنگک۔
