صدر ممنون حسین ءِ واھشت ءِ پد ءَ رائل کالج آف فزیشنز ءِ پاکستانی ڈاکٹر آنی واستہ توامیں کزبی چکاس آناں پاکستان ءَ کنگ ءِ پیسلہ
رائل کالج ءِ اے پیسلہ ءَ چہ ورنائیں پاکستانی ڈاکٹر آناں پٹ ءُُ پول ءُُ گہتریں آسراتی رس اَنت، پاکستانی ڈاکٹر آنی تجروبت ءُُ الاج ءِ جتائیں کار رپک ھم رائل کالج ءِ پٹ ءُُ پول ءُُ طبی لٹریکر ءِ واستہ سک باز سیت مند سہرا بوت کن اَنت، صدر ءِ مملکت ممنون حسین ءِ مراگش ءَ گوں گشتانک
ایڈنبرا ۔ 28 اگست (اے پی پی) صدر ممنون حسین ءِ واھشت ءِ پد ءَ رائل کالج آف فزیشنز ءَ پاکستانی ڈاکٹر آنی واستہ توامیں کزبی چکاوس آناں پاکستان ءَ کنائینگ ءِ پیسلہ کتگ۔ دوئیں ملک آنی حکومت زوت اے رد ءَ سرجمیں رھبند ءَ زور اَنت۔ صدر ءِ مملکت ممنون حسین ءَ مراگش ءَ گوں گشتانک دیان ءَ گوشت کہ رائل کالج ءِ اے پیسلہ ءَ چہ ورنا ئیں پاکستانی ڈاکٹر آناں پٹ ءُُ پول ءِ گہتریں آسراتی رس اَنت۔ ایشی ءَ چہ ابید پاکستانی ڈاکٹر آنی تجروبت ءُُ الاج ءِ جتائیں کار رپک ھم رائل کالج ءِ پٹ ءُُ پول ءُُ طبی لٹریجر ءِ واستہ سک باز سیت مند سہرا بوت کن اَنت۔ صدر ءِ مملکت ءَ اے جوانیں پیسلہ ءِ پد ءَ رائل کالج آف فزیشنز ءُُ ایشی ءِ زمہ وار آناں مبارک بات دات۔ ایشی ءَ چہ پیسر رائل کالج آف فزیشنز ایڈنیرا ءِ صدر پروفیسر ڈاکٹر ڈیرک بیل ءَ صدر ءِ مملکت ءَ را رائل کالج آف فیزیشنز ءِ دادی فیلو شپ داد دات۔ مراگش ءَ چہ پد میڈیا ءَ گوں گشتانک دیان ءَ صدر ءِ مملکت ممنون حسین ءَ گوشت کہ اے پاکستان نودربر آنی واستہ جوانیں آسراتی اِت، رائل کالج ءِ اے پیسلہ ءَ چہ پاکستان ءَ طب ءِ شوبگ ءَ جوانیں دیمروئی کنت اِنت۔ صدر ءِ مملکت ممنون حسین ءَ گوشت کہ گوستگیں 5سال آنی ساھت ءَ ملک ءَ سک باز دیمروئی ءِ کار بوتگ۔ نوکیں حکومت ءَ را لوٹ ایت کہ آ ھما دیمروئی ءِ کار آں جاڑی بدار ایت ءُُ وھد ءُُ موہ ءِ سر ءَ سرجم بکنت۔
