صدارتی گچین کاری تیٹی پاکستان تحریک انصاف نا اومیت دار ڈاکٹر عارف علوی بھلو گیشتری اسے اٹ سرسہبی دوئی کیک
اسلام آباد۔ 28 اگست (اے پی پی) بنجائی وزیر اطلاعات و نشریات فواد چوہدری پارینے کہ صدارتی گچین کاری تیٹی پاکستان تحریک انصاف نا اومیت دار ڈاکٹر عارف علوی بھلو گیشتری اسے اٹ سرسہبی دوئی کیک، وزیراعظم عمران خان سوشل میڈیا غا غٹ آن مست تینا اکاؤنٹ ءِ بطور قومی لیڈر جوڑ کرے، اپوزیشن نا صدارتی گچین کاری تیٹی یکجا مننگ یا اختلاف آتیان ہچ ءُ پرخ اس تمپک۔ سے شنبے نادے آ پارلیمنٹ ہاؤس نا پیشن میڈیا تون ہیت وگپ کرسا بنجائی وزیر اطلاعات فواد چوہدری پارے کہ داسہ سرکاری میڈیا اپوزیشن جماعت آتا سرجزآتے زیات کوریج کننگ ءِ۔ مسلم لیگ (ن) ، پاکستان پیپلزپارٹی و تحریک انصاف ہرمسٹ آک بھلو جماعت ءُ و ہرمسٹ نا تینا تینا پالیسیک ءُ اونا رداٹ او گچین کاری تیٹی کارہ۔ بنجائی وزیر پارے کہ صدارتی گچین کاری تے کن پاکستان تحریک انصاف نا اومیت دار ڈاکٹر عارف علوی ءِ، ہرا بھلو گیشتری اسے اٹ سرسہبی دوئی کیک۔ اوپارے کہ پاکستان تحریک انصاف تون صدارتی گچین کاری تیٹی سرسہبی کن نمبر آک پورو ءُ۔ اوپارے کہ دا بابت اپوزیشن یکجا مرے یا اختلاف مرے داڑآن ہچ ءُ پرخ اس تمپک۔ بنجائی وزیر پارے کہ وزیراعظم عمران خان بطور قومی لیڈر سوشل میڈیا غا تینا اکاؤنٹ ءِ غٹ آن مست جوڑ کریسس، او خلقت تون رابطہ کن سوشل میڈیا ءِ کاریم اٹ اتیک و اودے پسند ہم کیرہ۔
