اسلام آباد۔ 28 اگست (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ حضور سرور ءِ کونین ﷺ نا عزت و حرمت ہر مسلمان ءِ تینا جان آن زیات دوست ءِ۔ توہین آمیز خاکہ غاتا معاملہ غا ترکی ہم او آئی سی نا دیوان ءِ بٹنگ انگ اٹی تینا کڑد ءِ ادا کے۔ داخیال آتا درشانی ءِ او سے شنبے نادے داڑے وزارت پارلیمانی امور اٹی ترکی نا پاکستان اٹی سفیر تون اوڑدہی ٹی کرے۔ ترک سفیر ڈاکٹر بابر اعوان ءِ پی ٹی آئی نا سرسہبی آن پد حکومت سازی و اودے وزارت نا سنبھالنگ آ مبارکبادی پیش کرے۔ اوپارے کہ ترک پارلیمنٹ اٹی اڈ ہلوک پاک ترکی فرینڈ شپ گروپ نا چیئرمین نا تہنیتی کلہو ءِ ہم سرکرے۔ ڈاکٹر بابر اعوان ترکی نا سفیر ءِ بخیر اٹ پارے و پارے کہ پاکستان و ترکی مذہبی، دودوربیدگی و ایلمی نا رشتہ غاتے ٹی گنڈوک ءُ و ہڑتوم آ ملک آتے ٹی اقبال و رومی کون ءُ عظیم اسکالر ودی مس۔ داوخت آ ڈاکٹر بابر اعوان پارے کہ سرکار دوعالم نا عزت و حرمت آ ہر مسلمان ءِ تینا جان آن زیات دوست ءِ۔ اوترک سفیر ءِ وزیراعظم عمران خان نا توہین آمیز خاکہ غاتا معاملہ غا او آئی سی نا دیوان ءِ بٹنگ انگ نا معاملہ غا کلہو ءِ ہم سرکرے۔
