اسلام آباد۔ 28 اگست (اے پی پی) بنجائی وزیر انسانی حق ڈاکٹر شیریں مزاری پارینے کہ آئین پاکستان اٹی غٹ پاکستانی شاری تے انسانی حق انا فراوانی ءِ المی جوڑ کننگ نا ضمانت تننگانے و حکومت دا بابت تینا غٹ تر جہانی کانودی زمواری تے پورو کننگ کن پرعزم ءِ۔ داہیت ءِ او ہیومن رائٹس واچ انا ڈائریکٹر ایشیا ء براڈ ایڈمز ءِ نوشتہ کروک آ چھٹی ٹی پارینے۔ ہیومن رائٹس واچ انا کنڈآن وزیراعظم پاکستان ءِ نوشتہ کروک آ چھٹ انا حوالہ ءِ ترسا اوپارے کہ نن غٹ شاری تے انسانی حق انا فراوانی نا بابت کانود و گچین عملدرآمد و ننا پک کروک جہانی معاہدہ غاتا کمک اٹ ننا جہانی کانودی زمواری تا رداٹ ننا قومی کانودنا ٹہیفنگ نا گرج آن جوانی اٹ معلومدار ءِ۔ ننا حکومت تینا غٹ تر جہانی زمواری تے پورو کننگ کن پرعزم ءِ۔ اوپارے کہ نن تینا آئینی زمواری تے پورو کننگ آ یخین تخنہ۔ اوپارے کہ وزارت انسانی حق گچین ءُ ایکشن پلان اسے آ کاریم کننگ ءِ، نن تینا شاری تے انسانی حق انا فراوانی ءِ المی جوڑ کننگ اٹ خامی تیان معلومدار اُن و اوفتا مون ءِ توننگ کن کاریم کننگ اُن۔
