اسلام آباد۔ 27 اگست (اے پی پی) وزیراعظم عمران خان پارینے کہ ہراقومک وام تیا گزارہ کیرہ او تینا عزت و آجوئی ءِ گیرام کیرہ، قوم ءِ تینا نت تیا سلفنہ، نن ملک اٹی ہندن ءُ چاگڑد اس جوڑ کننگ اُن کہ الس خراج ایتے، داچرجوئی ٹی تینٹ مثال اس جوڑ مرینہ، گستاخانہ خاکہ غاتا معاملہ غا او آئی سی تون اواری اٹ حکمت عملی اس جوڑ کینہ، وار وار دُن انگا واقعہ غاتا مننگ مسلمان تا بے سہبی ءِ۔ دوشنبے نادے ایوان بالا ٹی خیال آتا درشانی ءِ کرسا وزیراعظم عمران خان پارے کہ نن گستاخانہ خاکہ غاتا معاملہ ءِ اقوام متحدہ نا جنرل اسمبلی ٹی ستمبر اٹی چست کینہ، ای مغرب ءِ چاوہ، ہموجاگہ نا راج آزادی رائے نا قائل ءُ و داہیت ءِ پہہ مفسہ کہ نبی کریم تون ننے اخہ در محبت ءِ، ننا جوزہ غاک امر ءُ ، ہموڑے داوڑنا حرکت سلمان رشدی نا شیطانی آیت آتیان پد اخہ وار ہم دا معاملہ مسنے، دیکی ملک آتے ٹی مسلمان تیان نفرت کروک آتے موقع ملاکہ او مسلمان تے آزادی اظہار رائے نا پن آ شغان خلیر، نن او آئی سی ءِ دا معاملہ غا امنا کینہ، دا معاملہ وا ر وار مننگ مسلمان تا بے سہبی ءِ ۔ اوپارے کہ او آئی سی ءِ دا بابت اسٹریٹجی اس بایدے جوڑ کروئی مرے، چار یورپی ملک آتے ٹی ہولوکاسٹ آ کانود اس جوڑ ءِ ، انسانی کمیونٹی اسے گڑاسے آن تکلیف اس رسینگے تو دا غلط ءِ ، نن مغرب ءِ دا پہہ کین کہ ننے نبی کریم نا بابت داوڑنا گڑاتیان تکلیف مریک، اول ننے مسلمان تے دا معاملہ غا یکجا کروئی مریک و ہروئی مریک کہ ننے داوڑنا خبرآتیان بھاز تکلیف مریک۔ اوپارے کہ نن تینا سینٹ ءِ بڑزکو کہول آ دننگ خوانہ۔
