اسلام آباد۔ 27 اگست (اے پی پی) اسپیکر قومی اسمبلی اسد قیصر تون پاکستان اٹی چین نا سفیر یاؤچن دوشنبے نادے پارلیمنٹ ہاؤس اٹی اوڑدہی کرے ہراٹی ہڑتوم آ کنڈآتا تعلقداری تون اوار تین پہ تینی است خواہی نا معاملہ غاتیا خیال آتا درشانی ءِ کننگا۔ داوخت آ چینی سفیر تون ہیت وگپ کرسا اسپیکر پارے کہ پاک چین سنگتی مدام ہر امتحان آ پورو سلیسونے و ہڑتوم آ دوست ملک آک علاقائی و جہانی فورم آتیا اسہ ایلو نا موقف نا مخ تفی ءِ کرینو۔ اوپارے کہ ہڑتوم آ ہمسایہ ملک آتا سنگتی نا رشتہ تین پہ تینی پت و شرف نا سوگو بنداو تیاٹی ءِ۔ پاک چین اقتصادی راہداری ڈٹ نئے بیرہ ہڑتوم آ ہمسایہ ملک آک بلکن مچ آ ڈیہہ نا شونداری و شونہالی نا ڈٹ ءِ۔ پاکستان تحریک انصاف نا پوسکن گچین مروک آ حکومت سی پیک ڈٹ آتیا عملدرآمد ءِ المی جوڑ کننگ کن ہروڑگام گیج چست کیک۔ اوپارے کہ چین اتون تعلقداری تے ودفنگ ساڑی آ حکومت نا خارجہ پالیسی نا اولیت آتیٹی اوار ءِ۔
