اسلام آباد۔ 24 اگست (اے پی پی) وزیراعظم عمران خان پارینے کہ پاکستان نا الس ءِ پوسکن آ اسمبلی آن بھاز زیات اومیت ارے۔ اوداہیت ءِ اسپیکر قومی اسمبلی اسدقیصر تون ہیت و گپ کرسا پارے ہراجمعہ نادے داڑے وزیراعظم آفس اٹی اوڑدہی کرے۔ اسپیکر قومی اسمبلی وزیراعظم ءِ منصب سنبھالنگ آ و عئید انا مبارکبادی ہم تس۔ اوڑدہی ٹی اسمبلی ٹی کانود سازی نا معاملہ غاتیا خیال آتا درشانی مس ، وزیراعظم دا ہیت آ زور شاغا کہ اسمبلی نا خڑچ آتیٹی ہرممکنہ حد اسکان کمتی بایدے اتنگے۔ اسپیکر قومی اسمبلی پارے کہ کانود سازی معاملہ غاتا جوانی اٹ انجام دہی و الس نا بنداوی ویل آتا ترندی اٹ ایسری کن غٹ کوشست آتے کاریم اٹ اتنگک۔
