وزیراعظم عمران خان نا قوم اتون تران
اسلام آباد۔ 19 اگست (اے پی پی) وزیراعظم عمران خان پارینے کہ پوسکن آ پاکستان نا تصور رحم دلی نا جوزہ غا مبنی راج انا ءِ، ایلوتے کن اول تینٹ مثال اس جوڑ مریوہ ، وزیراعظم ہاؤس ءِ کاریم اٹ اتپرہ ، بیرہ اِرا کار و اِرا ملازم تخیوہ، وزیراعظم ہاؤس نا گاڈی تا نیلامی ءِ کننگک، السی پیسہ غاتا رکھ ءِ کیوہ، پاکستان ءِ اسہ عظیم ءُ و شون ہلوک اسلامی شرحالی ریاست اس جوڑ کننگ کن ریاست مدینہ نا اصول آتے تینا کننگ نا گرج ءِ، ملک اٹی کانود و میرٹ نا بالادستی ، معیشت، انصاف ، تعلیم، جان جوڑی ، ٹیکسیشن نا نظام نا گچینی، ہمہ جہت احتساب، کرپشن نا چٹفنگ ، انسانی وسیلہ غاتا شونداری ، وام تا جاگہ غا قومی وسیلہ غاتا سیبو، سادہ زند اختیار کننگ آ خصوصی چکار کینہ،کرپٹ عنصر آک کنا دشمنک ءُ ، ملک بچک و کرپٹ خلقت بچک، کرپٹ عنصر آتیا دوشاغنہ تو شور کیرہ ولے الس کنتون اسہ ٹیم اسے نا وڑاٹ سلے، نیزگار و نزور تپہ غاتا شرحالی اولیت ءِ، پاکستان اللہ نا خاص ءُ نعمت اسے ، ننے اواری اٹ دانا رکھ ءِ کروئی ءِ، قومی تشکیل نا کمک اٹ ہندن ءُ پاکستان اسے نا خواہندار اُٹ ہراتم ملک اٹی اسہ ہم زکواۃ ہلوک اُس ملپک و نن ایلو ملک آتا کمک ءِ کینہ۔ اوداخیال آتا درشانیءِ یک شنبے نانن قوم اتون تینا اولیکو تران اٹی کرے۔ عمران خان تینا نشریاتی تران اٹی وزیراعظم ہاؤس ءِ اعلیٰ درجہ نا یونیورسٹی اس جوڑ کننگ نا پڑو کرے۔ اوپاکستان آن دُزی کروک آ پیسہ غاتے پدی اتنگ وخت اس کہ ادارہ جاتی اصلاحات و کفایت شعاری کن جتا جتا ءُ ٹاسک فورس اس جوڑ کننگ نا پڑو ءِ کرے۔ وزیراعظم تینا تران اٹی قوم ءِ مون تروک ویل و چیلنج آتا احاطہ و اوفتا ایسری ءِ پیش کرے۔ او ملک آ ودوک آ وام تا بھاریم تون اوار معاشی حالیت، سادگی و کفایت شعاری نااہمیت، حکمران تپہ نا زند انا طرز، پوسکن آ پاکستان اٹی پوسکن ءُ سوچ تینا کننگ نا گرج ، پیشن نا امداد و وام تیا سیبو نا جاگہ غا تینا نت تیا سلنگ، ایف بی آر، پولیس، جان جوڑی ، تعلیم ، انصاف نا نظام نا گچینی، سول سروس اصلاحات، جوابدہی ، ضلعی نظام نا براہ راست گچین کاری، روزگار ودی کننگ، ہڑزآن ہند آتا جوڑ جاڑ، زالبول و چناتے کن گوازی تا پارک جوڑ کننگ، ورناتے اوار ملفسا سرسوز و صاف ستھرا پاکستان اس جوڑ کننگ، سیل و سوات ءِ مون آ دننگ، بلوچستان و فاٹا نا خراب حالیت آتا گچینی ، در ملکی زرکاری ٹی آسراتی، اوورسیز پاکستانی تے کن آسانی ودی کننگ تون اوار اوار خارجہ تعلقداری خاص کر ہمسایہ ملک آتون گچین رابطہ استوار کننگ نا بارواٹ تینا وژن ءِ پیش کرے۔ وزیراعظم قوم ءِ مون تروک حالیت آتا ذکر ءِ کرسا پارے کہ پاکستان نا تاریخ اٹی داخہ مشکل مالی حالیت آک وخت اس ہم ہلورہ، ملک وام تا بھاریم اٹ ڈبنگوک ءِ، 10 سال مست دا وامک 6 ہزار ارب روپئی ئسر، 2013ء ٹی 15ہزار ارب روپئی مسر وخت اس کہ اینو دا وامک 28 ہزار ارب روپئی اسکان سرمسنو۔ اوپارے کہ حالیت دادے کہ سود تننگ کن ننے وام ہلوئی تمنگ ءِ ، روپئی آ مچ آ زور پیشن نا وام تا سوب آن تمنگ ءِ ، کم غذائیت نا سوب چناک بھاز ناجوڑی تا گواچی مریرہ، تینا چناتیا خڑچ کننگ کن ملک اتون پیسہ اف، اوپارے کہ داوخت وزیراعظم پاکستان تون 524ملازم ءُ ، وزیراعظم ہاؤس 1100 کینال آٹی ءِ، وزیراعظم نا 80 گاڈی وخت اس کہ 33 بلٹ پروف ءُ، وزیراعظم نا دورہ غاتیا 65 کروڑ خڑچ کننگا، وزیراعظم ہاؤس نا سالانہ خڑچ آک کروڑآتیٹی ءُ، ڈی سی، کمشنر و گورنر بھلا بھلا اُراتیٹی رہینگرہ۔ عمران خان پارے کہ اسہ کنڈآ وام وامدار و ایلو صاحب اقتدار نا شاہانہ زند ءِ تدیفنگ ءُ، اگہ ملک ہنداوڑ چلینگسا ہنا تو قوم شون ہلپک، ننے تینا سوچ و رہن سہن ءِ بدلیفوئی ءِ۔ او داہیت آ زور شاغا کہ ننے است اٹ رحم ودی کروئی مریک، اینو وخت ءِ کہ نن تینا حالیت ءِ بدلیفن، عمران خان پارے کہ تینے بدلیفنگ کن غٹ آن مست کانود نا بالادستی المی ءِ۔ اوپارے کہ مدینہ نا ریاست نا اصول ءِ دیکی والاک تینا کریر، خلفائے راشدین تینے احتساب کن الس نا مون آ پیش کریرہ، حضرت ابوبکرؓ خلیفہ مس تو او تینا پُچ آتا دوکان ءِ بند کریسس، داڑے خلقت اقتدار اٹی پیسہ جوڑ کننگ کن بریک، عمران خان پڑو کرے کہ او 2ملازم و 2گاڈی تخک، وزیراعظم ہاؤس نا گاڈی تے نیلام کیک۔ وزیراعظم عمران خان تینا تران نا بناء ٹی پارے کہ ای اینو غٹ آن مست تینا غٹ کارندہ غاتا منت واری ءِ ہرفیوہ ہراک 22 سال مست کنتون داتحریک و جہاد نا بناءِ کریسر۔ اوپارے کہ اسہ انسان ہمومریک ہرا تینا کیریئر ءِ جوڑ کننگ کن کاریم کیک و ایلو پین مسخت اسے کن یا مشن نا خاطر کاریم کیک۔ کنا رول ماڈل نبی کریم ﷺ و قائد اعظم ءِ ۔ نبی کریم ﷺ مدینہ نا ریاست ءِ جوڑ کرے و دنیا ٹی اسہ انقلاب اس بس ایس۔ 22 سال مست ای سیاست اٹی بسٹ تو کنا مسخت دائس کہ ملک ءِ علامہ اقبال ؒ نا اسلامی فلاحی ریاست نا تغ ءِ تعبیر جوڑ کیو۔ اوپارے کہ پاکستان اٹی سیل و سوات نا بھلو وارخواہی ارے داخہ بھلو وارخواہی دنیا ٹی پین ہچ ءُ جاگہ اس اف ، ہرسال چار پوسکن ءُ ریزارٹس ملنگک و سمندر تون کرک آتے شون ایتنہ تانکہ خلقت تینا خاہوت تون ہمونگ کار۔ اوپارے کہ فاٹا ٹی جنگ انا سوب بھس کاری و خراب حالیت آک ءُ ہموڑے معمول نا حالیت آک افس، فاٹا و کے پی کے ءِ زوت ضم کننگک و ہموڑے ہندی حکومت آتا گچین کاری ءِ کرفنگک۔ اوپارے کہ بلوچستان اٹی حالیت آک خراب ءُ پورو تینا زور ءِ خلینہ کہ ہراخلقت ناراض ءُ و عسکریت پسند مسنو اوفتے اوار اتین۔ دا چرجوئی ٹی تینا پورو توانائی تے خڑچ کینہ۔ اوپارے کہ سویلی پنجاپ بایدے صوبہ اس جوڑ مرے۔ 12 کروڑ نا آبادی آ تالان پنجاپ آ سہی وڑاٹ حکومت کننگ مفک۔ کراچی پاکستان نا معاشی کیپٹیل ءِ کراچی نا حالیت آک جوان مفسہ تو دانا ملک آ زہم تمک۔ کراچی ٹی ٹرانسپورٹ ءِ گچین جوڑ کننگک و کراچی ٹی کنوئی ءُ دیر و کچرہ غاتا ویل ءِ ایسر کننگک۔ نیشنل ایکشن پلان نا بیست ٹک آک غٹ سیاسی جماعت آتا امنائی فیصلہ ئس۔ داڑآ عملدرآمد کرفینہ۔ دہشت گردی ءِ چٹفوئی ءِ انتئے کہ دہشت گردی نا چٹفنگ اسکان ملک اٹی امن و شونہالی بننگ کپک۔ وزیراعظم پارے کہ پاکستان نا بابت کنا وژن دادے کہ اسہ دے اس بریک پاکستان اٹی زکواۃ ہلوک ءُ اسٹ اس ہم مفک۔ شاید کہ دادے کنا زند اٹی بف ولے ہندن ءُ دے اس ضرور بریک کہ نن ایلو ملک آتا کمک ءِ کینہ و ای ہندن ءُ پاکستان اس ہُننگ نا خواہندار اُٹ۔
