اسلام آباد ۔ 19 اگست (اے پی پی) مزن وزیرعمران خان ءَ گوشت کہ نوکیں پاکستان ءِ سسا رحمدلی ءِ جوزگ ءِ پد ءَ چاگرد ءِ جوڑیشت اِنت، دومیگ آنی ھاترا وت درور ءِ جوڑ باں، مزن وزیر کارگس ءَ را کارمرد نہ کناں، ایوک ءَ دو گاڑی ءُُ دو مزدگر داراں، مزن وزیر کارگس ءِ گاڑی آنی نیلامی کنگ بیت، السی زرّ آنی پاسبانی ءَ کن آں، پاکستان ءَ را یک دیمروئی کنوکیں اسلامی گہبودی ریاست ءِ جوڑ کنگ ءِ واستہ ریاست ءِ مدینہ ءِ رپک آناں وتی کنگ ءِ ضلورت اِنت، ملک ءَ کانود ءُُ میرٹ ءِ مستری، معیشت، انصاف، وانگ ءُُ زانگ، جان سلامتی، ٹیکسیشن ءِ نظام ءِ گہتری، یکوئی، کیاسگری، کرپشن ءِ ھلاسی، بنی آدمی آسراتی ءِ دیمروئی ، وام آنی مٹ ءَ راجی آسراتی ، سادگیں زندمان ءِ گوازینگ ءِ نیمگ ءَ دلگوشی انت، کرپٹ چیز منی دیمروئی اَنت، ملک بچ ایت یا کرپٹ مردم بچ اَنت، کرپٹ آنی سر ءَ دست چنگل جناں گڈا آ کوکار کناں بلے الس منی گوما یک ٹیمب ءِ رنگ ءَ اوشتاتگ، گریب ءُُ ھمزوریں مردم آنی گہبور مئے اولی ترجی ءِ تہ ءَ ھوار اِنت، پاکستان اللہ ءِ ھاسیں نعمت اِت، مارا یکجا بوھگ ءُُ ایشی ءَ پاسبانی کنگی اِنت، راجی یکوئی ءِ وسیلگ ءَ اے رنگیں پاکستان ءِ واھشت مند آں وھد ءِ ملک ءَ زکوٰۃ زوروک مہ بیت ءُُ ما دومی ملک آں گوں کمک کناں۔ آئی ءَ اے ھیالانی درشانی یک شمبے ءِ شپ ءَ راج ءَ گوں وتی اولی رسانکی گشتانک ءَ کت۔ عمران خان ءَ مزن وزیر کارگس ءَ را ٹوھیں درجگ ءِ یونیورسٹی جوڑ کنگ ءِ جار جت۔ آئی ءَ پاکستان ءَ چہ دُزی کتگیں پیسہ واپس آرگ وھدیکہ ادارگ ءِ وش نامی ءِ واستہ جتا جتائیں ٹاسک فورس جوڑ کنگ ءِ جار جت۔ مزن وزیر ءَ وتی کلوہ ءِ تہ ءَ راج ءِ جیڈھ آنی گیواری ءِ شون دات۔ ضلعی نظام ءِ یک شل ءَ گچین، روزگار پیداک کنگ، سستائیں لوگ ءِ جوڑیشت، زالبول ءُُ زھگ آنی واستہ لیب ءِ میدان ، پارکس جوڑ کنگ، ورنا آنا گوں وت ھمگام کنان ءَ سر سبزیں ساپ ءُُ سلہ ایں پاکستان جوڑ کنگ، سیل ءُُ سواد ءِ دیمروئی ، بلوچستان ءُُ فاٹا ءِ انوگیں جاور ھال ءِ گہتری، در ملکی سرمایہ کاری ءَ آسراتی، اوورسیز پاکستانیز آنی واستہ آسانی پیداک کنگ ءَ ھوار درئی یکوئی ھاسیں رنگ ءَ ھمساھگیں ملک آنی گوما جوانیں یکوئی آنی بابت ءَ وتی وژن پیش کت۔ عمران خان ءَ گوشت کہ یک نیمگ ءِ راج وام دار انت ءُُ دومی نیمگ ءَ سروک واجئی زند گوازینگ ءَ اَنت، اگاں ملک ءَ ھمے رنگ ءَ گام جنان بوت گڈا راج دیمروئی نہ کنت، مارا وتی سسا مٹ کنگی اِنت مارا وتی نندگ ءُُ پاداھگ مٹ کنگی اِنت۔ آئی ءَ اے گپ ءِ سر ءَ زور پر دات کہ مئے دل ءَ رحم پیداک کنگی اِنت، مرچی وھد اِنت کہ ما وتی ھالت ءَ مٹ بکن آں۔ عمران خان ءَ گوشت کہ وت ءَ را مٹ کنگ ءِ واستہ دُرستاں چہ پیسر اول سر ءَ کانود ءِ سروکی ضلوری اِنت۔ آئی ءَ گوشت کہ مدینہ ءِ ریاست ءِ رھبند روبرکتی ملک آں زرتگ، خلفائے راشدین وت ءَ را کیاسگری ءِ واستہ الس ءِ دیم ءَ پیش کتگ، حضرت ابو بکرؓ خلفیہ جوڑ بوتگ گڈا آئی ءَ وتی گد ءِ دُکان بند کتگ۔ ادا مردم سروکی ءَ پیسہ کماھینگ ءِ واستہ کاینت، کس سروکی ءَ بوت ءُُ پیسہ کماھینت نہ کنت۔ عمران خان ءَ جار جت کہ آ دو ملازم ءُُ دو گاڑی گوں وت دار ایت، مزن وزیر کارگس ءِ گاڑی آنی نیلامی کنگ بیت۔ آئی ءَ گوشت کہ وتی گس ءَ نندگ لوٹ اتگ بلے سیکورٹی ءِ ایشو اِنت، گورنر ہاؤسز ءَ اچ گورنر نہ نندایت آئی ءَ مزن وزیر کارگس ءَ را ٹوھیں درجگ ءِ مزن شاہ دربر جاہ ءِ جوڑ کنگ ءِ جار جت ءُُ گوشت کہ ڈن ملک ءَ چہ پٹ ءُُ پول کار آں کار آں ءُُ جوانیں پٹ ءُُ پول کنگ بیت، صوبگ ءِ توامیں گونر ءُُ سر وزیر آناں سادگی کنگ لوٹ ایت۔ مزن وزیر ءَ ملکی معشیت ءُُ ادارگ آنی گہتری ءِ زکر کنان ءَ گوشت کہ دُرستاں چہ پیسر ایف بی آر ءَ را شر کنان، وتی پاد آنی سر ءَ اوشتگی انت ءُُ پیسہ یکجاہ کنگی اِنت، مزن مزنیں گس آنی تہ ءَ نندوکیں مردم ٹیکس نہ دیاں، وام ھر کس دنت آ تئی آزاتی ءَ ھم پچ گپت ، مارا کس ءِ دیم ءَ دست دراج کنگ ءِ ضلورت نہ اِنت، مزن وزیر ءَ پاکستان ءَ چہ دُزی کتگیں پیسہ ءَ را واپس آرگ ءِ واستہ ٹاسک فورس جوڑ کنگ ءِ جار جنان ءَ گوشت کہ الس ءَ را دل یکیم کنان ءَ آ وانی ٹیکس آوانی سر ءَ ھرچ بنت۔ آئی ءَ گوشت کہ آ چونیں لیڈر اِنت آ وتی دولت ءَ ڈن ءَ ایر کنت وھدیکہ سیاست پاکستان ءَ کنت۔ آئی ءَ گوشت کہ ڈن ءَ پیسہ ایر کنوکیں سیاستدان ڈن ءَ چہ کنٹرول ھم بوت کنت، الس بِھ اے وڑیں لیڈر ءَ را ووٹ مہ دیاں آئی ءِ پیسہ اے ملک ءَ نہ انت۔
