کوئٹہ۔18 اگست( اے پی پی )بلوچستان عوامی پارٹی ناجام کمال صوبہ نا پوسکن آ وزیراعلیٰ گچین مس ،بلوچستان اسمبلی نا پوسکن آ قائد ایوان کن دیوان پوسکن گچین مروک آ اسپیکر عبدالقدوس بزنجو نا کماشی ٹی مس ہراٹی مسکوہی وزیراعلیٰ ثنااللہ زہری تینا رکنیت نا سوغند ہلک ۔صوبہ ٹی وزارتِ اعلیٰ کن بلوچستان عوامی پارٹی نا جام کمال نا مقابلہ متحدہ مجلس عمل نا میر یونس عزیز زہری تون مس ۔اسپیکر قائد ایوان نا گچینی کن اِرالابی جوڑ کرے ہراٹی جام کمال ءِ وونٹ تروک آتے کن لابی اے وخت اس کہ یونس زہری کن لابی بی جوڑ کننگا ،داوخت آ دلچسپ حالیت داہم نظر بس کہ مسلم لیگ (ن) نا راہشون و مسکوہی وزیراعلیٰ بلوچستان ثنااللہ زہری جام کمال خان ءِ وونٹ تس ،وزیراعلیٰ نا ووٹنگ نا عمل پورو مننگ آن پد اسپیکر نتیجہ نا پڑو ءِ کرسا پارے اسمبلی ٹی جم وڑاٹ 59 وونٹ کاسٹ مس ہرافتیان جام کمال ءِ 39 وونٹ ملا وخت اس کہ یونس زہری 20 وونٹ ہلک ۔ہنداوڑ جام کمال صوبہ نا 17می وزیراعلیٰ گچین مس ، جام کمال نا باوہ جام یوسف و پیرہ جام غلام قادر ہم صوبہ نا وزیراعلیٰ مسنو۔جام کمال ءِ بلوچستان عوامی پارٹی و سیوتی تا مخ تفی دوئی ئس وخت اس کہ یونس عزیز زہری ءِ بی این پی مینگل ومتحدہ مجلس عمل پندار کریر ۔
