اسلام آباد۔ 15اگست (اے پی پی) نوک گچین بوتگیں سپیکر قومی اسمبلی اسد قیصر ءَ گوشت کہ من قومی اسمبلی ءِ باسک آنی نیمگ ءَ چہ منی ءَ سر ءَ کتگیں دل یکیمی آنی شگر ءُُ منت وار آں، آ الس ءُُ اسمبلی ءِ باسک آنی امیت آں سرجم کنگ ءِ کوشست ءَ کن آں ءُُ قائداعظم محمد علی جناح ءُُ مولوی تمیزالدین ءِ نیمگ ءَ چہ جوڑ کتگیں پارلیمانی روایات ءُُ زمہ واری آناں مھکم دارگ ءُُ ایشانی تہ ءَ گیشی آرگ ءِ کوشست ءَ کن آں، زاتی نپ ءُُ سیت ءَ چہ برز تر بوھان ءَ ملکی نپ ءُُ سیت ءِ سر ءَ کار کن آں۔ چار شمبے ءِ روچ ءَ قومی اسمبلی ءِ سپیکر ءِ بستار ءَ گچینی ءَ چہ پد ھیالانی درشانی ءَ کنان ءَ اسد قیصر ءَ گوشت کہ آ اللہ تعالیٰ ءِ شگر ءَ گپت آئی ءَ ایشرا پاکستان ءِ قومی اسمبلی ءِ سپیکر ءِ سیٹ ءِ سر ءَ ندگ ءِ موہ پُجارینتگ۔ تحریک ءِ انصاف ءِ چیئرمین عمران خان ءُُ ایندگر گل آنی نیمگ ءَ آئی ءِ سر ءَ اوست ءُُ امیت کنگ ءِ پد ءَ آوانی شگر ءُُ منت گپت۔
