اسلام آباد ۔ 12 اگست (اے پی پی) بابائے راج قائداعظم محمد علی جناحؒ ءِ وژن ءِ روژنی ءَ ماتیں وتن ءَ را امن ءُُ دیمروئی ءُُ وشھالیءِ گڑھ جوڈ کنگ ءِ پکہ جزم ءِ تجدید ءَ گوں 71می آجوئی روچ (باندا) راجی ءُُ ملی جوش جوزگ ءَ گوں گوازینگ بیت۔ اے درگت ءَ سرجمیں ملک ءَ لس موکل بیت، روچ ءِ بنداتی سرجمیں ملک ءِ مسیتانی تہ نماز فجر ءِ پدا ملکی دیمروئی ،یکجہتی ،امن ءُُ وشھالی ءَ گوں کشمیری راج ءِ دراجیں جدوجہد ءِ سومبندی ءِ ھاترا ھاسیں دعاءَ گوں بیت۔ روچ ءِ بنگیجی ءِ سرا بنجاہی بُن شہر ءِ تہ31ٹوپانی ءُُ صوبائی بن شہرانی تہ21,21ٹوپانی سلامی دیئگ بیت۔سہب ءِ 8 بجءُ 58 منٹ سرا سرجمیں ملک ءِ تہ سائرن جنئگ بنت ءُُ 9بج ءَ بنجاہی بُن شہر ءَ راجی بیرک برز کنگ ءِ بنجاہی مراگش برجم دارگ بیت وھدیکہ بیرک برز کنگ ءِ مراگش صوبائی بُن شہرانی ابید آزات کشمیر ءُُ گلگت بلتستان ءِ ھوار ضلعی ہیڈکوارٹرز ءِ تہ برجم دارگ بنت۔اے درگت ءَ دراھیں سرکاری ءُُ جندی ماڑی آنی سرا راجی بیرک جنئگ بیت ایشی ءِ ابید برزیں سرکاری ماڑی آنی سرا بتی جنئگ بنت۔ صدر مملکت،مزن وزیرءُُ ھاسیں مردمانی نیمگا چہ روچ ءِ درگت ءَ ھاسیں کلہو جاڑی کنگ بنت۔ الیکٹرانک میڈیا ءِ سرا ھاسیں شنگکاری ءِ بند ءُُ بست کنگ بیت وھدیکہ پرنٹ میڈیا ھم ھاسیں چھاپ آنی بندءُُ بست کن ایت۔ڈنی ملکاں پاکستانی مشنز ءِ تہ ھم بیرک برز کنگ ءِ پُرشانیں مراگش برجم دارگ بیت۔اے درگت ءَ راجی ساز جنئگ بنت ءُُ آجوئی روچ ءِ درگت ءَ ملک ءِ صدر ءُُُ مزن وزیر ھاسیں کلہو دنت۔اے موہ ءَ پاکستانی سفیر/ہائی کمشنرز افسران ءُُ کمیونٹی باسک چہ تران ءِ تہ تحریک پاکستان ءِ جنز ءِ سرا روژنی مان کن انت۔وانگجاھ ءِ زھگ نامداریں راجی ساز،ٹیبلوز ءُُ ربیدگی لیب پیش دارانت۔انگریزی ءُُ ھندی زبانانی تہ پاکستان ءِ باروا ھاسین سپلیمینٹری ھم چھاپ کنگ بنت۔ دریں اثناء پاکستان ءِ سلاھ بندیں اردوءِ نیمگا چہ آجوئی روچ ءِ درگت ءَھم مراگش مراگش برجم دارگ بنت۔وزارت ھالرسانکی ءُُ شنگکاری ءَ ھم آجوئی روچ راجی جوش ءُُ جوزگ ءَ گوں گوازینگ ءِ ھاترا بندءُُ بست کتگ ات۔اے روچ ءِ درگت ءَ پاکستان ٹیلی ویژن کارپوریشن ءُُ شالیمار ریکارڈنگ کمپنی ءِ چینل اے ٹی وی چہ دراجیں وھد ءِ ھاسیں شنگکاری پیش دارگ بنت وھدیکہ راجی رسانکدر ایسوسی ایٹڈ پریس آف پاکستان (اے پی پی)ءَ آجوئی روچ ءِ درگت ءَ لہتیں مراگش،سیمینارز،باست ءُُ واستءُُ ٹاک شوزءِ کوریج ءِ ھاترا ھاسیں بندءُُ بست کتگ ات۔پی ٹی وی ءَ جشن آجوئی ءِ درگت ءَ یکم چہ 14اگست ءَ تاں ھاسیں جنزءِ بند ءُُ بست کتگ ات۔ 14 اگست ءَ یوم آزادیءِ درگت ءَ پی ٹی وی ءَ سرجمیں روچ ءِ شنگکاری ءِ بندءُُ بست کن ایت۔ پاکستان بوائز سکاؤٹس ایسوسی ایشن ءُُ پاکستان گرلز گائیڈ ایسوسی ایشن ءَ ھم آجوئی روچ ءِ درگت ءَ ھاسیں مراگش آنی بندءُُ بست کتگ انت۔ یوم آزاتی ءِ درگت ءَ لہتیں فاسٹ فوڈز،پچ ءُُ پوشاکاں،موبائل کمپنیاں،ٹیکسی سروسز ءُُ دگراں راج ءِ ھاترا ھاسیں رعایتی پیکجز ءِ جار ھم جتگ ات۔
