حسن ابدال۔ 8 اگست(اے پی پی) نگران وزیراعظم جسٹس (ر) ناصر الملک طالب علم آتیا زور شاغانے کہ او محنت و خواری اٹ علم حاصل کننگ کن کوشست کیر و اخلاقی اقدار ہیل کننگ آ ہم چکار کیر ۔ داخیال آتا درشانی ءِ او چارشنبے نادے واہ ٹی الماماتر پریزنٹیشن کانوینٹ ہائی سکول نا دورہ ٹی ہیت وگپ کرسا کرے ۔ اوپارے کہ تعلیم راج اٹی مثبت بدلی اتنگ کن کڑد ادا کیک ۔ وزیراعظم تینا اسکول نا 1957ء آن 1963ء نا بنائی سال آتے یات کرسا پارے کہ او 6 سال نا وئی ٹی اسہ بورڈنگ طالب علم اسے نا وڑاٹ اسکول اٹی داخل مسوسس ۔ او بے کچ شونک اٹ مستین نا ہنوک آ وخت آتا ذکر ءِ کرسا پارے کہ سسٹر جیمز ہراکہ تینا سخت گیری نا سوب پنی ئس ، اواونا لائخی تا سوب ڈبل پروموشن تس ۔ اوپارے کہ سوات نا مر انگا علاقہ غان تعلق مننگ نا سوب او سال اٹی بیرہ اِراوار تینا باوہ و پیرہ ہی آ علاقہ غا ہناکہ و اونا تینا خاہوت تون رابطہ تُواٹی اسہ وار چھٹی نا کمک اٹ مسکہ ۔ اوطالب علم آتون پارے کہ ہراتم او اسکول ءِ ہلرہ تو او داوخت ءِ تینا زند انا گچین وخت انا وڑاٹ یات کیرہ ۔
